وفاقی وزیرداخلہ محسن نقوی کی مولانا فضل الرحمن سے ملاقات، پاک بھارت کشیدگی ، فلسطین کے مسئلے پر تبادلہ خیال

منگل 29 اپریل 2025 16:02

لاہور (اُردو پوائنٹ اخبارتازہ ترین - اے پی پی۔ 29 اپریل2025ء) وفاقی وزیرداخلہ محسن نقوی نے منگل کو یہاں جمعیت علمائے اسلام (ف) کے سربراہ مولانا فضل الرحمن سے اہم ملاقات کی جس میں باہمی دلچسپی کے امور، خطے میں پاک بھارت کشیدگی اور فلسطین کے مسئلے پر تفصیلی تبادلہ خیال کیا گیا۔

(جاری ہے)

ترجمان محکمہ داخلہ کے مطابق ملاقات کے دوران وفاقی وزیرداخلہ نے مولانا فضل الرحمن کو بھارت کے غیر منطقی اور یکطرفہ اقدامات پر پاکستان کے اصولی موقف اور نیشنل سکیورٹی کمیٹی کے حالیہ فیصلوں سے آگاہ کیا۔

محسن نقوی نے کہا کہ بھارت آگ سے کھیلنے کی کوشش کر رہا ہے اور پاکستان کسی بھی مہم جوئی کا پوری قوت سے جواب دے گا۔مولانا فضل الرحمن نے گفتگو کرتے ہوئے کہا کہ بھارتی وزیر اعظم نریندر مودی مسلمان دشمن ہے اور جہاں اسلام اور مسلمانوں کے خلاف کوئی محاذ ہوگا، مودی وہاں کھڑا نظر آئے گا۔وفاقی وزیرداخلہ نے مولانا فضل الرحمن کی خیریت دریافت کی اور ان کی صحت کے لئے نیک خواہشات کا اظہار بھی کیا۔