ؒ خیبرپختونخوا اسمبلی کی سب کمیٹی برائے قواعد کار و طریقہ کار، مراعات اور سرکاری یقین دہانیاں پر عملدرآمد کا اجلاس

/خیبرپختونخوا ہاؤس اسلام آباد کے امور پر تفصیلی تبادلہ خیال کیا گیا، کمیٹی کو ہاؤس کے عملے کی مجموعی تعداد اور دستیاب سہولیات کے بارے میں بریفنگ دی گئی

منگل 29 اپریل 2025 21:40

y پشاور (اُردو پوائنٹ اخبارتازہ ترین - آن لائن۔ 29 اپریل2025ء) خیبرپختونخوا اسمبلی کی سب کمیٹی برائے قواعد کار و طریقہ کار، مراعات اور سرکاری یقین دہانیاں پر عملدرآمد کا اجلاس چیئرمین تاج محمد کی زیر صدارت منعقد ہوا۔ اجلاس میں اراکین صوبائی اسمبلی شرافت علی، محمد انور خان اور میاں عمر کاکاخیل نے شرکت کی۔اجلاس میں خیبرپختونخوا ہاؤس اسلام آباد کے امور پر تفصیلی تبادلہ خیال کیا گیا۔

کمیٹی کو ہاؤس کے عملے کی مجموعی تعداد اور دستیاب سہولیات کے بارے میں بریفنگ دی گئی۔ کمیٹی نے بتایا کہ خیبرپختونخوا ہاؤس اسلام آباد بالخصوص ایس-1 اور ایس-2 بلاکس خستہ حالی کا شکار ہیں، جن کی مکمل تزئین و آرائش ناگزیر ہے۔اجلاس میں بجلی، پانی اور گیس کے نظام کی مکمل مرمت اور بہتری پر زور دیا گیا۔

(جاری ہے)

اس کے ساتھ ساتھ کمیٹی نے پرانے اور ٹوٹے ہوئے فرنیچر کو تبدیل کرنے کی ہدایت کی۔

کمیٹی نے فیصلہ کیا کہ آئندہ اجلاس خیبرپختونخوا ہاؤس اسلام آباد میں منعقد ہوگا تاکہ عملاً صورتحال کا جائزہ لیا جا سکے۔مزید برآں، کمیٹی نے اسلام آباد ہاؤس کی صفائی اور مناسب دیکھ بھال کو یقینی بنانے، اور خصوصی دوروں کے موقع پر معزز اراکین اسمبلی کے لیے کمرے دستیاب ہونے کی ضرورت پر زور دیا۔کمیٹی نے عملے کی تربیت کو وقت کی اہم ضرورت قرار دیتے ہوئے کہا کہ شفٹ انچارج، ویٹرز اور دیگر عملہ کو مہمان نوازی کے جدید تقاضوں کے مطابق تربیت فراہم کی جائے تاکہ معزز مہمانوں کو بہترین خدمات مہیا کی جا سکیں۔