موسم گرماکے دوران باغبانوں کو باغات کی مناسب نگہداشت کی سفارش

بدھ 30 اپریل 2025 15:19

فیصل آباد (اُردو پوائنٹ اخبارتازہ ترین - اے پی پی۔ 30 اپریل2025ء) موسم گرما کی شدت میں بتدریج اضافہ اور دھوپ کی تمازت کے اثر کی وجہ سے چھوٹے و بڑے پھلدارپودوں کونقصان پہنچنے کاخدشہ ہوتاہے لہٰذا باغبان پودوں کی مناسب نگہداشت یقینی بنائیں۔جامعہ زرعیہ فیصل آبادکے ماہرین اثمار نے باغبانوں کو سفارش کی کہ وہ موسم گرما میں پھلدار خصوصاً چھوٹے پودوں کو زیادہ درجہ حرات اور گرم ہوا سے محفوظ بنانے کیلئے کسی غفلت کا مظاہرہ نہ کریں۔

انہوں نے کہاکہ پنجاب کے میدانی علاقوں میں مئی سے جولائی تک سخت گرمی پڑتی ہے جس کے باعث پھل جھلس جاتا، چھلکا پھٹ جاتااور پھل کی کوالٹی بری طرح متاثر ہوتی ہے۔انہوں نے کہاکہ ضیائی تالیف کا عمل متاثر ہونے کی وجہ سے پودوں میں خوراک بنانے کے عمل میں رکاوٹ پیدا ہوتی ہے جس سے پھل کا کیرا بڑھ جاتا ہے اسلئے پھلدار پودوں کو گرمی کے اثرات سے محفوظ کرنے کیلئے پودوں کے گھیرے میں ہلکی گوڈی کرکے سطح زمین کو چار سے چھ انچ گھاس کی موٹی تہہ سے ملچنگ کی جائے۔

(جاری ہے)

انہوں نے کہاکہ باغبان گرمیوں میں چھوٹے پودوں کو ہفتہ میں دوبار جبکہ بڑے پودوں کو8 سے 10 دن کے وقفہ سے پانی لگائیں نیز گرمیوں میں آبپاشی صبح یا شام کے وقت کریں۔ انہوں نے کہاکہ مئی و جون کے مہینوں میں پھلدار پودوں کے تنوں کو نیلا تھوتھا و چونا کے محلول سے سفید ی کی جائے تاکہ تنے گرمی کے مضر اثرات سے محفوظ رہ سکیں۔