Live Updates

مودی کی مسلمانوں کیخلاف نفرت انگیز پالیسیاں،عالمی میڈیا نے پردہ چاک کر دیا

مودی حکومت پہلگام واقعے کے بعد اپنے سیاسی مقاصد کے لئے مسلمانوں کے خلاف نفرت پھیلارہی ہے،عالمی میڈیا

بدھ 30 اپریل 2025 16:32

اسلام آباد(اُردو پوائنٹ اخبارتازہ ترین - این این آئی۔ 30 اپریل2025ء)بین الاقوامی ذرائع ابلاغ نے پہلگام فالس فلیگ آپریشن کے بعد بھارت میں حکومتی سرپرستی میں مسلمانوں کے خلاف نفرت انگیز مہم کا پردہ چاک کردیاہے۔کشمیرمیڈیاسروس کے مطابق بھارت میں تیزی کے ساتھ بڑھتی ہوئی مسلم دشمنی اور مودی حکومت کی مسلمانوں کے خلاف نفرت انگیز پالیسیوں پر عالمی میڈیا نے اپنی رپورٹس میں چشم کشا انکشافات کیے ہیں۔

حالیہ رپورٹس کے مطابق بی جے پی رہنمائوں کی ایما ء پر بھارت کے مختلف علاقوں میں مسلمانوں پر تشدد کی نئی لہر دیکھی جا رہی ہے۔ خاص طور پر اتر پردیش، ہریانہ اور مہاراشٹرا میں مسلمانوں پر حملوں اور دھمکیوں میں اضافہ ہوا ہے۔رپورٹس میں کہاگیا ہے کہ مودی حکومت کی مسلم دشمنی کی انتہا یہ ہے کہ بھارتی ڈیجیٹل میڈیا نے مسلمانوں کے خلاف زہر اگلنا شروع کر دیا ہے۔

(جاری ہے)

الجزیرہ کی رپورٹ کے مطابق پہلگام حملے کے بعد بھارت میں 20نفرت انگیز اسلاموفوبک گانے ریلیز کیے گئے ہیں جن میں مسلمانوں کے خلاف تعصب بھڑکایا گیا۔اسی طرح بی جے پی رہنما نیتیش رانے نے مسلمانوں کے معاشی بائیکاٹ کی اشتعال انگیز اپیل بھی کی ہے جو کہ کشمیری مسلمانوں پر حملوں اور بھارت بھر میں 21سے زائد مسلم مخالف تشدد کے واقعات کے بعد سامنے آئی ہے۔

الجزیرہ کے مطابق پہلگام واقعے کے بعد بھارت میں مسلمان مریضوں کا علاج روکنے اور طلبا ء پر تشدد کے متعدد واقعات رپورٹ ہوئے ہیں۔واشنگٹن ڈی سی کے مرکز برائے مطالعہ منظم نفرت کی رپورٹ میں کہا گیا ہے کہ بھارت میں مسلم دشمنی میں شدید اضافہ ہو چکا ہے اور مودی حکومت مسلمانوں کے خلاف نفرت بھڑکا کر سیاسی مقاصد حاصل کر رہی ہے۔دفاعی ماہرین کا کہنا ہے کہ مودی ہندو مسلم فسادات کو ہوا دے کر خطے میں کشیدگی بڑھانے کی کوشش کر رہے ہیں۔ یہ صورت حال بھارت میں مسلمانوں کی زندگی کو مزید مشکل بنا رہی ہے جبکہ عالمی سطح پر مودی کی مسلم دشمن پالیسیوں کی مذمت کی جارہی ہے۔