اصل ملزمان پر نیب کیس واپس لے چکی ،باقی ملزمان بھی بری ہونے کے حقدار ہیں،رینٹل پاور کیس کا تحریری فیصلہ جاری

بدھ 30 اپریل 2025 19:45

اسلام آباد (اُردو پوائنٹ اخبارتازہ ترین - این این آئی۔ 30 اپریل2025ء)اسلام آباد کی احتساب عدالت نے رینٹل پاور ریفرنس کیس سے راجہ پرویز اشرف اور دیگر کو بری کرنے کا تحریری فیصلہ جاری کر دیا۔احتساب عدالت کے جج محمد علی وڑائچ نے تحریری فیصلہ جاری کیا، جس کے مطابق سپریم کورٹ کے احکامات پر نیب نے رینٹل پاور پلانٹس کے خلاف انکوائری شروع کی۔

ابتدائی تحقیقات کے بعد 31 ملزمان کے خلاف ریفرنس فائل کیا گیا۔

(جاری ہے)

تحریری فیصلے میں کہا گیا کہ کار کے کمپنی کو غیر قانونی کنٹریکٹ دینے پر 12 ملزمان کے خلاف سپلیمنٹری ریفرنس فائل ہوا۔فیصلے کے مطابق سپریم کورٹ نے 5 ستمبر 2023ء کے فیصلے میں نیب ترامیم کو جزوی طور پر کالعدم قرار دے دیا، جس کے بعد ریفرنس واپس نیب عدالت میں آگیا۔ ریکارڈ سے پتہ چلتا ہے کہ نیب نے 31 میں سے 11 ملزمان کی حد تک کیس واپس لے لیا تھا۔فیصلہ میں کہا گیا کہ باقی ملزمان کا کیس اصل ریفرنس کے 11 ملزمان کے برابر ہے جنہیں بری کیا جاچکا ہے، ریفرنس میں باقی بچ جانے والے ملزمان پر اصل ملزمان کی حوصلہ افزائی کا الزام ہے، اصل ملزمان پر نیب کیس واپس لے چکی لہٰذا باقی ملزمان بھی بری ہونے کے حقدار ہیں۔