Live Updates

ہمارے مزدور قومی ترقی کے اصل محرک ہیں ،وزیر تجارت

ہم جامع اقتصادی ترقی کے حصول کے لیے تمام شراکت داروں کے ساتھ قریبی تعاون جاری رکھیں گے، جام کمال

جمعرات 1 مئی 2025 15:11

ہمارے مزدور قومی ترقی کے اصل محرک ہیں ،وزیر تجارت

اسلام آباد (اُردو پوائنٹ اخبارتازہ ترین - این این آئی۔ 01 مئی2025ء)وفاقی وزیر برائے تجارت جام کمال خان نے کہاہے کہ ہمارے مزدور قومی ترقی کے اصل محرک ہیں ،ہم جامع اقتصادی ترقی کے حصول کے لیے تمام شراکت داروں کے ساتھ قریبی تعاون جاری رکھیں گے۔ اپنے بیان میں انہوںنے کہاکہ یومِ مزدور کے موقع پر میں اٴْن محنتی مردوں اور عورتوں کو دلی خراجِ تحسین پیش کرتا ہوں جن کی انتھک کاوشیں ہماری معیشت کی ریڑھ کی ہڈی ہیں۔

انہوںنے کہاکہ محنت کا وقار ایک مضبوط اور خوشحال قوم کی بنیاد ہے، ہمارے مزدور، چاہے وہ صنعت، زراعت، تجارت یا خدمات کے شعبے سے وابستہ ہوں، قومی ترقی کے اصل محرک ہیں۔انہوںنے کہاکہ وزارتِ تجارت اس بات پر کاربند ہے کہ ایسا ماحول فراہم کیا جائے جہاں مزدوروں کے حقوق کا تحفظ ہو، باعزت روزگار اور منصفانہ تجارت کے مواقع میں اضافہ ہو۔

(جاری ہے)

انہوںنے کہاکہ ہم جامع اقتصادی ترقی کے حصول کے لیے تمام شراکت داروں کے ساتھ قریبی تعاون جاری رکھیں گے تاکہ افرادی قوت کی مہارتوں میں اضافہ کیا جا سکے، مقامی صنعتوں کو فروغ دیا جا سکے، اور برآمدی صلاحیت کو وسعت دی جا سکے جس کا براہِ راست فائدہ ہمارے مزدور طبقے کو پہنچے گا۔

انہوںنے کہاکہ آئیے ہم سب پاکستان بھر کے ہر مزدور کے لیے مساوات، انصاف اور احترام کی اقدار کو ایک بار پھر اپنا عزم بنائیں۔