نئے تعینات ڈی پی او سوات محمد عمر خان نے اپنے عہدے کا چارج سنبھال لیا

جمعہ 2 مئی 2025 21:26

پشاور (اُردو پوائنٹ اخبارتازہ ترین - اے پی پی۔ 02 مئی2025ء) سوات میں نئے تعینات ہونے والے ڈسٹرکٹ پولیس آفیسر محمد عمر خان (پی ایس پی) نے بطور ضلعی پولیس سربراہ اپنے عہدے کا چارج سنبھال لیا۔ ڈی پی او آفس پہنچنے پر ایڈیشنل ایس پی سوات غلام صادق، ایس پی ہیڈ کوارٹر عطاء اللہ شمس، ایس پی سکیورٹی پرویز خان، ایس پی ایلیٹ فہد خان سمیت دیگر سینئر پولیس افسران اور دفتری عملے نے نئے ڈی پی او کا پرتپاک استقبال کیا، پولیس کے چاق و چوبند دستے نے انہیں سلامی دی۔

چارج سنبھالنے کے بعد نئے ڈی پی او نے تمام ایس پیز، ایس ڈی پی اوز اور دفتری عملے سے خصوصی ملاقات کی۔ ملاقات میں انہوں نے کہا کہ ضلع بھر میں امن و امان کی صورتحال کو بہتر بنانا، میرٹ کی بالادستی کو یقینی بنانا، قانون اور انصاف کا موثر نفاذ اور عوام کو بہترین پولیس خدمات کی فراہمی ان کے اولین ترجیحات میں شامل ہے۔

(جاری ہے)

جس میں کوتاہی یا غفلت ہر گز برداشت نہیں کی جائے گی۔

انہوں نے کہا کہ کمیونٹی پولیسنگ کو فروغ دینا ہماری اولین ترجیح ہوگی۔ تمام افسران مقامی معززین اور پی ایل سیز کے ساتھ باقاعدہ ملاقاتیں کریں، کیونکہ عوام کے تعاون کے بغیر امن کی فضا کو مزید بہتر بنانا ممکن نہیں ہے۔ شہدائے پولیس کے حوالے سے انہوں نے ہدایات جاری کرتے ہوئے کہا کہ جو اہلکار امن کے لیے اپنی جانوں کا نذرانہ پیش کر چکے ہیں، ان کے اہل خانہ کے ساتھ خصوصی شفقت کا برتاؤ کیا جائے اور ان کے مسائل کو فوری طور پر حل کیا جائے۔

منشیات کے خلاف کارروائی کے بارے میں ڈی پی او نے واضح ہدایات دیتے ہوئے کہا کہ منشیات فروشوں کے خلاف کوئی رعایت نہیں برتی جائے گی اور ہم اپنے نوجوانوں کو اس لعنت سے بچانے کے لیے ہر ممکن اقدامات کریں گے۔نے تعینات ڈی پی او سوات محمد عمر خان اپنے عہدے کا چارج سنبھالتے ہی پولیس اور عوام کے درمیان اعتماد کو مضبوط بنانے، انصاف کی فوری فراہمی اور عوامی مسائل کے حل کو یقینی بنانے کا عزم ظاہر کیا۔