پبلک پرائیویٹ پارٹنر شپ کے نام پر پارکوں پر قبضے و تجارتی استعمال نہیں ہونے دیں گے،منعم ظفر خان

کلفٹن کے مختلف پارکوں کو قابض مافیا سے بچانے کے لیے ہر ممکن جدو جہد کریں گے ،ادارہ نور حق میں کلفٹن کے مکینوں کے وفد سے گفتگو سٹی کونسل میں پارکوں کو تجارتی بنیادوں پردینے کی پُر زور مذمت کی،عدالت سے بھی رجوع کریں گے ، سیف الدین ایڈوکیٹ

ہفتہ 3 مئی 2025 21:05

کراچی(اُردو پوائنٹ اخبارتازہ ترین - این این آئی۔ 03 مئی2025ء) امیر جماعت اسلامی کراچی منعم ظفر خان نے کہا کہ پیپلز پارٹی کی صوبائی حکومت کی سرپرستی میں پبلک پرائیویٹ پارٹنر شپ کے نام پر کھیل کے میدانوں اور پارکوں پر قبضے و تجارتی استعمال ہر گز نہیں ہونے دیں گے ۔ کلفٹن کے مختلف بلاکس میں موجود پارکوں کو قابض مافیا سے بچانے کے لیے ہر ممکن آئینی ، قانونی اور جمہوری جدو جہد کریں گے ، عدالتی فیصلے کے باوجود پارکو ں کا تجارتی استعمال توہین ِ عدالت ہے ، ان خیالات کا اظہار انہوںنے کلفٹن بلاک 2عمر شریف پارک پر قبضے و تجارتی استعمال کے حوالے سے ادارہ نور حق میں آنے والے علاقہ مکینوں کے وفد سے گفتگو کرتے ہوئے کیا ۔

وفد میں احمد فہیم مغل،رضیہ سیال،امین فہیم ،فضل الرحمن،عبید الرحمن،عالمگیر،انس خان،محمد سلمان و دیگر شامل تھے ۔

(جاری ہے)

ملاقات میں نائب امیر کراچی و اپوزیشن لیڈر کے ایم سی سیف الدین ایڈوکیٹ، امیر ضلع جنوبی سفیان دلاور، ڈپٹی سیکریٹریز ابن الحسن ہاشمی، یونس بارائی بھی موجود تھے ۔سیف الدین ایڈوکیٹ نے کہا کہ سٹی کونسل کراچی میں پبلک پرائیویٹ پارٹنرشپ کے نام پر پارکوں کو تجارتی بنیادوں پردینے کی بات کی گئی تو ہم نے پُر زور مذمت کی اور مطالبہ کیا کہ اس حوالے سے کمیٹی بنائی جائے، ہم پارکوں پر قبضے کے خلاف کورٹ میں بھی جائیں گے۔

وفد نے کہا کہ کلفٹن بلاک 1,2,3,4 کے پارکوں پر قبضہ اور ا ن کاکمرشل استعمال کیا جارہا ہے۔ سٹی کونسل میں جماعت اسلامی سب سے بڑی اپوزیشن جماعت ہے، ہم چاہتے ہیں کہ سٹی کونسل میں پارکوں پر قبضے اور کمرشل سرگرمیاں ختم کروانے کے حوالے سے بات کی جائے۔ کلفٹن کے پارکوں کو پبلک پرائیویٹ پارٹنر شپ کے تحت ٹارگٹ کیا گیا ہے۔ کلفٹن بلاک 2 کے پارک کو ہشام تیلی کے حوالے کر دیا گیا جسے وہ کمرشل استعمال کررہے ہیں۔

کورٹ کے فیصلے کے باوجود پارک میں کمرشل سرگرمیاں جاری ہیں،علاقہ مکینوں نے احتجاج اور عدالت سے بھی رجوع کیا ہے ۔ اس حوالے سے ہم نے مرتضی وہاب ، ڈی جی پارک اور ہشام تیلی کے خلاف عدالت میں پٹیشن دائر کی ہے‘ جس کی اب تک 3سماعتیں ہوچکی ہیں جبکہ 5مئی کو چوتھی سماعت ہوگی ۔اسی طرح کلفٹن بلاک 1،3اور 4 کے پارکوں کی بھی صورتحال ہے وہاں بھی پارکوں پر قبضہ کر کے پبلک پرائیوٹ پارٹنر شپ کے نام پر پارکس کو کمرشل کر کے مختلف تجارتی سرگرمیاں کروائی جارہی ہیں ۔ہمیں جماعت اسلامی سے امید ہے کہ وہ ہمارے مسائل حل کرائے گی ۔