راولپنڈی ،تینوں الائیڈ ہسپتالوں میں ایمرجنسی ہائی الرٹ، ریہرسل بھی کی گئی

ایمرجنسی ڈیپارٹمنٹ کے تمام ڈاکٹرز طلب ،مریضوں کی بروقت نگہداشت یقینی بنانے کیلئے اضافی طبی عملہ بھی الرٹ پر رکھ لیا گیا

جمعہ 9 مئی 2025 06:50

راولپنڈی (اُردو پوائنٹ اخبارتازہ ترین - این این آئی۔ 09 مئی2025ء)راولپنڈی کے تینوں الائیڈ اسپتالوں میں ایمرجنسی ہائی الرٹ جاری کیا گیا جبکہ ایمرجنسی سے نمٹنے کیلئے باقاعدہ ریہرسل بھی کی گئی۔ایمرجنسی ڈیپارٹمنٹ کے تمام ڈاکٹرز کو فوری طلب کر لیا گیا ہے۔ ایمرجنسی الرٹ کسی ممکنہ ہنگامی صورتحال کے پیش نظر جاری کیا گیا ہے۔ہولی فیملی، ڈی ایچ کیو اور بینظیر بھٹو اسپتالوں میں ڈاکٹر اور معاون عملے کو ہائی الرٹ پر رکھا گیا ہے جبکہ کوئی فون بند نہیں کرے گا۔

(جاری ہے)

ایمرجنسی میں میڈیسن، بلڈ، سرجیکل آئٹمز اور آکسیجن کی موجودگی کو یقینی بنا دیا گیا ہے۔ مریضوں کی بروقت نگہداشت یقینی بنانے کیلئے اضافی طبی عملہ بھی الرٹ پر رکھا گیا ہے۔محکمہ صحت پنجاب کی ہدایت پر ہسپتالوں میں الرٹ نافذ کیا گیا، عوام سے غیر ضروری طور پر ہسپتال نہ آنے کی اپیل کی گئی ہے۔ تمام ایمرجنسی سہولیات مکمل فعال ہیں اور ریسکیو ڈیسک بھی قائم کر دیئے گئے، متعلقہ اداروں کو بھی ممکنہ صورتحال سے نمٹنے کیلئے الرٹ کر دیا گیا۔وائس چانسلر راولپنڈی میڈیکل یونیورسٹی پروفیسر ڈاکٹر محمد عمر نے الائیڈ ہاسپٹیلز کے تمام میڈیکل سپرنٹنڈنٹ اور ہیڈ آف ڈیپارٹمنٹس کے ساتھ مشاورت مکمل کرکے ضروری ہدایات جاری کر دیں۔