نواب اسلم رئیسانی کے خلاف انتخابی عذرداری ناقابل سماعت قرار، سپریم کورٹ نے کیس تکنیکی بنیادوں پر خارج کردیا

سپریم کورٹ کے متعدد فیصلوں میں کہا گیا کہ اگر تصدیق شدہ بیان حلفی نہ ہوں تو الیکشن ٹربیونل میں ایسی درخواست ناقابل قبول ہوتی ہے، ریمارکس، جسٹس شاہد وحید کی سربراہی میں سپریم کورٹ کے 3 رکنی بینچ نے الیکشن کمیشن کے خلاف اپیل پر سماعت کی

فیصل علوی جمعہ 9 مئی 2025 15:15

نواب اسلم رئیسانی کے خلاف انتخابی عذرداری ناقابل سماعت قرار، سپریم ..

اسلام آباد(اردوپوائنٹ اخبار تازہ ترین۔09 مئی 2025)جمعیت علماء اسلام کے کامیاب امیدوار نواب اسلم رئیسانی کیخلاف انتخابی عذرداری ناقابل سماعت قرار،سپریم کورٹ نے کیس تکنیکی بنیادوں پر خارج کر دیا،جسٹس شاہد وحید کی سربراہی میں سپریم کورٹ کے 3 رکنی بینچ نے الیکشن کمیشن کے خلاف اپیل پر سماعت کی۔جسٹس عامر فاروق کا کہنا تھا کہ ہمارے پاس تو معاملہ بالکل مختلف ہے آپ کی درخواست ہی ناقابل سماعت قرار دے دی گئی تھی۔

درخواست لگائے گئے بیان حلفی مصدقہ نہ ہونے کی وجہ سے مسترد ہوئی۔وکیل وسیم سجاد نے عدالت کو بتایا کہ بیان حلفی اوتھ کمشنر کی تصدیق کا لگایا ہوا تھا جس پر جسٹس شاہد وحید کا کہنا تھا کہ اوتھ کمشنر نے بیان حلفی کو ضابطے کے مطابق اٹیسٹ نہیں کیا، گواہوں کے بیانات بھی درست طور پر نہیں لگائے گئے تھے۔

(جاری ہے)

جسٹس شاہد وحید نے ریمارکس دیتے ہوئے کہا کہ سپریم کورٹ کے متعدد فیصلوں میں کہا گیا کہ اگر تصدیق شدہ بیان حلفی نہ ہوں تو الیکشن ٹربیونل میں ایسی درخواست ناقابل قبول ہوتی ہے۔

سوال ہے کہ کیا اوتھ کمشنر کی درخواست درست ہے کہ نہیں۔وکیل وسیم سجاد نے مو¿قف اختیار کیا کہ بیان حلفی خود ایک تصدیق ہے۔ جسٹس شاہد وحید نے وسیم سجاد کو مخاطب کرتے ہوئے کہا کہ آپ نے بیان حلفی درست نہیں دیا۔ طے شدہ اصولوں کے تحت بیان حلفی جمع کرانا ضروری ہے۔جسٹس شاہد وحید بولے وکیل کیسے جانتا تھا اور وکیل کیسے تصدیق کرسکتا ہے۔ آپ نے بیان حلفی درست نہیں دیا۔

بیان حلفی کی تصدیق ہونا ضروری ہے۔ سپریم کورٹ قرار دے چکی کہ غیر مصدقہ بیان حلفی والی الیکشن پٹیشن ناقابل قبول ہے۔وکیل درخواست گزار کا کہنا تھا کہ عدالت تکنیکی بنیادوں پر کیوں جارہی ہے۔ میرا کیس بہت سادہ ہے۔میں نے صرف ووٹ ری کاونٹنگ کا کہا ہے اس میں کیا قباحت ہے۔جسٹس شاہد وحید نے اس موقع پر وسیم سجاد سے معذرت کرتے ہوئے کہا کہ آپ کی درخواست خارج کی جاتی ہے۔ خیا ل رہے کہ اس سے قبل بلوچستان ہائی کورٹ کے جج جسٹس عبداللہ بلوچ پرمشتمل الیکشن ٹریبونل1نے حلقہ پی بی37مستونگ سے کامیاب امیدوارنواب محمد اسلم رئیسانی کے خلاف سردار نور احمد بنگلزئی کی جانب سے دائرانتخابی عذرداری کیس قانونی نقائص کی بنیاد پرخارج کردیا تھا۔