افغان طالبان کی جارحیت، سرحد پر کھڑے فرنٹیئر کور کے جوانوں کے حوصلے غیر متزلزل

اگر افغان طالبان نے دوبارہ یہ حرکت کی تو جواب اس سے بھی زیادہ سخت ہوگا، ایف سی اہلکار

جمعہ 17 اکتوبر 2025 16:26

راولپنڈی (اُردو پوائنٹ اخبارتازہ ترین - اے پی پی۔ 17 اکتوبر2025ء) افغان طالبان کی جارحیت، سرحد پر کھڑے فرنٹیئر کور کے جوانوں کے حوصلے غیر متزلزل اور وہ ملکی دفاع کیلئے پرعزم ہیں۔تفصیلات کے مطابق افغان طالبان اور خوارج کی جارحیت کے خلاف سرحد پر موجود فرنٹیئر کور کے جوان ملکی دفاع کیلئے پرعزم ہیں، خیبرپختونخوا اور بلوچستان کی مٹی سے جنم لینے والے فرنٹیئر کور کے فوجی جوان اپنے وطن کے دفاع کیلئے ہمہ وقت تیار ہیں۔

دفاع وطن کا فریضہ سرانجام دینے والے فرنٹیئر کور کے جوانوں کا کہنا ہے کہ ہم پاک افغان سرحد پر کھڑے ہیں اور اپنے ملک کا دفاع کرنا جانتے ہیں، اگر افغان طالبان نے دوبارہ یہ حرکت کی تو جواب اس سے بھی زیادہ سخت ہوگا، فتنہ الخوارج نے ہماری سرحدوں پر ناپاک حملے کی کوشش کی، ہم نے جواب میں ان کی پوسٹوں کو تباہ کردیا۔

(جاری ہے)

ایف سی جوان نے کہا کہ کوئی پاکستان کی طرف میلی آنکھ سے نہیں دیکھ سکتا کیونکہ اس کے فوجی سرحد پر حفاظت کیلئے موجود ہیں، ہم اپنے ملک اور مادر وطن کیلئے کسی بھی قربانی سے دریغ نہیں کریں گے، ہم تمام جوان اور ہمارے ٹینک ہمہ وقت تیار ہیں ۔

ایف سی جوان نے کہا کہ دشمن اس خام خیالی میں نہ رہے کہ وہ ہم سب سے بچ کر نکل جائے گا، اگر دشمن نے دوبارہ ہمارے ملک پر حملہ کی کوشش کی تو وطن کے بیٹے منہ توڑ جواب دیں گے۔