صوبائی وزیر صحت کا ڈیرہ غازی خان کا دورہ ، سیلاب سے متعلق اجلاس کی صدارت

ڈی جی خان ڈویژن میں فلڈ مینجمنٹ کیلئے سروے کروایا جارہا ہے، خواجہ سلمان رفیق

پیر 12 مئی 2025 21:45

صوبائی وزیر صحت کا ڈیرہ غازی خان کا دورہ ، سیلاب سے متعلق اجلاس کی صدارت

لاہور (اُردو پوائنٹ اخبارتازہ ترین - آن لائن۔ 12 مئی2025ء) صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے ڈیرہ غازی خان کا دورہ کیا۔ ڈائریکٹر جنرل پی ڈی ایم اے عرفان علی کاٹھیا و دیگر افسران بھی ہمراہ ہیں۔کمشنر آفس ڈی جی خان میں سیلاب اور ڈویلپمنٹ سکیموں سے متعلق اجلاس بھی منعقد ہوا۔کمشنر اشفاق احمد چوہدری اور چیف انجینئر انہار نے اجلاس کے دوران بریفنگ دی۔

ڈپٹی کمشنر محمد عثمان خالد ،ڈی پی او سید علی و دیگر افسران بھی شریک ہوئے۔ڈی جی خان ڈویژن کے دیگر ڈپٹی کمشنرز ،ڈی پی اوز اور متعلقہ افسران نے بذریعہ ویڈیو لنک اجلاس میں شرکت کی۔صوبائی وزیر کو دریاؤں بالخصوص رود کوہیوں کے سیلاب سے متعلق بریفنگ دی گئی۔صوبائی وزیر صحت خواجہ سلمان رفیق نے کہاکہ ڈی جی خان ڈویژن میں فلڈ مینجمنٹ کیلئے سروے کروایا جارہا ہے۔

(جاری ہے)

سیلابی پانی سے قیمتی انسانی جانوں اور املاک کو محفوظ بنانا ہے۔ڈی جی خان اور راجن پور اضلاع کی 13 چھوٹی بڑی رود کوہیوں کی فزیبلٹی سٹڈی جاری ہے۔رود کوہیوں کے پانی کو ذخیرہ کرنے کیلئے چھوٹے بڑے ڈیمز تجویز کئے جائیں گے۔ خواجہ سلمان رفیق نے کہاکہ ڈی جی خان اور راجن پور میں رود کوہیوں کے قدرتی چینلز کی 21 جگہوں پر بھل صفائی جاری ہے۔ بھل صفائی 31 مئی تک مکمل کرنے کا ٹاسک دیا گیا ہے۔ فلڈ کیریئر چینلز کی صفائی کرکے دریا تک سیلابی پانی کو محفوظ راستہ دیا جائے گا۔