نوازشریف سینٹر آف ایکسیلینس میں ایکٹیویٹی بیسڈ لرننگ بچوں کی ذہنی پختگی کا باعث بنے گی، وزیرتعلیم پنجاب

منگل 13 مئی 2025 17:24

لاہور (اُردو پوائنٹ اخبارتازہ ترین - اے پی پی۔ 13 مئی2025ء) وزیر تعلیم پنجاب رانا سکندر حیات کی زیر صدارت نواز شریف سینٹر آف ایکسیلنس فار ارلی چائلڈ ہوڈ ایجوکیشن کے قیام بارے جائزہ اجلاس منعقد ہوا۔ اجلاس میں صوبائی وزیر تعلیم نے سینٹر آف ایکسیلنس کے تعمیراتی کاموں میں پیش رفت کا جائزہ لیا اور فوری تکمیل یقینی بنانے کی ہدایت کرتے ہوئے کہا کہ آئندہ چند روز میں وزیر اعلی پنجاب سینٹر آف ایکسیلینس کا خود افتتاح کریں گی۔

(جاری ہے)

افتتاحی تقریب کے انتظامات وزیر اعلی کے شایان شان کئے جائیں۔انہوں نے کہا کہ نواز شریف سینٹر آف ایکسیلنس ای سی ای رومز، جمنازیم، سوئمنگ پول اور دیگر سٹیٹ آف دی آرٹ سہولیات پر مشتمل ہوگا اور ابتدائی تعلیم کے لئے بچوں کی تخلیقی،فکری اور سماجی نشوونما کے ضمن میں جدید تعلیمی ماحول فراہم کرے گا۔وزیر تعلیم نے مزید کہا کہ نواز شریف سینٹر آف ایکسیلینس فار ارلی چائلڈ ہوڈ ایجوکیشن سہولیات کے تناظر میں چھوٹے بچوں کا جم خانہ کہلائے گا جبکہ یہاں ایکٹیویٹی بیسڈ لرننگ اوائل عمری میں بچوں کی ذہنی پختگی کا باعث بنے گی۔