لاہورہائیکورٹ نے پانچ سالہ بچی سے زیادتی کرنے والے سوتیلے باپ کی پھانسی کی سزا کو عمر قید میں تبدیل کردیا

پیر 19 مئی 2025 13:23

لاہور (اُردو پوائنٹ اخبارتازہ ترین - اے پی پی۔ 19 مئی2025ء) لاہورہائیکورٹ نے پانچ سالہ بچی سے زیادتی کرنے والے سوتیلے باپ کی پھانسی کی سزا کو عمر قید میں تبدیل کردیا۔لاہورہائیکورٹ کے جسٹس فاروق حیدر اور جسٹس علی ضیا باجوہ پر مشتمل دو رکنی بینچ نے اپیل پر سماعت کی ۔

(جاری ہے)

ڈپٹی پراسیکیوٹرجنرل رانا محمد عمران انجم نے مجرم کی اپیل کی مخالفت کی اور دورکنی بنچ کو بتایا کہ مقتولہ بچی کی والدہ کی جانب سے اپنے شوہر کے خلاف مقدمہ درج کروایا گیا ،تھانہ ملت ٹائون فیصل آباد نے27 مارچ 2021 کو پانچ سالہ بچی کے قتل کا مقدمہ درج کیا ،ایف آئی آر پہلے نامعلوم ملزم کے خلاف تھی بعد میں بچی کے سوتیلے باپ کو نامزد کیا گیا ،ملزم اور متاثرہ بچی کاڈی این اے میچ ہوگیا ، ڈپٹی پراسیکیوٹرجنرل نے مزید عدالت کو بتایا کہ ٹرائل کورٹ نے پولیس تفتیش ، گواہوں کے بیانات کی روشنی میں مجرم کو سزائے موت سنائی ، دوسری جانب وکیل صفائی کی جانب سے مجرم کی بریت کے لئے دلائل دئیے۔

عدالت نے فریقین کے وکلا کے دلائل سننے کے بعد ایف آئی آر میں نامزد نہ ہونے پر مجرم کی سزائے موت کو عمر قید میں تبدیل کردیا۔