پنجاب لائبریریز فاؤنڈیشن کے بورڈ آف گورنرز کا اجلاس،داستان گوئی پراجیکٹ کے آغاز کا فیصلہ

لاہور (اُردو پوائنٹ اخبارتازہ ترین - این این آئی۔ 19 مئی2025ء) پنجاب لائبریریز فانڈیشن کے بورڈ آف گورنرز کا 69واں اہم اجلاس قائداعظم لائبریری لاہور میں منعقد ہوا۔ اجلاس کی صدارت بورڈ کے چیئرمین جناب جاوید اسلم نے کی۔اجلاس میں بچوں میں کتب بینی کے فروغ کے لیے ’’داستان گوئی پراجیکٹ‘‘کے آغاز کی منظوری دی گئی۔ اس پراجیکٹ کے تحت صوبے بھر کی لائبریریوں میں بچوں کے لیے دلچسپ، سبق آموز اور تخلیقی داستان گوئی کے سیشنز منعقد کیے جائیں گے، جن کا مقصد بچوں کی تخیل پروری، علمی شغف اور کتاب سے وابستگی کو فروغ دینا ہے۔

اجلاس کے دوران سیکرٹری آرکائیوز اینڈ لائبریریز جناب محمد خان رانجھا نے شرکا کو "ای-لائبریری" منصوبے کی تفصیلات سے آگاہ کیا اور اس کی علمی و تعلیمی افادیت پر روشنی ڈالی۔

(جاری ہے)

انہوں نے صوبے بھر میں قائم کمیونٹی لائبریریز کو فعال بنانے کے لیے تجاویز بھی پیش کیں، جن میں لائبریری عملے کی تربیت، کتابوں کی فراہمی، جدید سہولیات کی فراہمی، اور مقامی کمیونٹی کی شمولیت جیسے نکات شامل تھے۔

انہوں نے کہا کہ دیہی و نیم شہری علاقوں میں لائبریری کلچر کو پروان چڑھانے کے لیے مربوط حکمت عملی اپنانا وقت کی اہم ضرورت ہے۔ڈائریکٹر پنجاب لائبریریز فانڈیشن جناب عبد الرحمن آصف نے اجلاس کے دوران بورڈ کو ادارے کے انڈوئمنٹ فنڈ کی موجودہ حیثیت، اس کے استعمال کی شفاف حکمت عملی، اور مالیاتی ضوابط سے آگاہ کیا۔ انہوں نے لائبریریز کی کٹیگریز کا تفصیلی خاکہ پیش کیا اور ہر کٹیگری کے لیے مختص فنڈز کی تقسیم، ترجیحات اور اہداف سے متعلق تفصیلی بریفنگ دی۔

معروف شاعر اور ادبی شخصیت جناب عباس تابش، جو ادارہ ترقی ادب کی نمائندگی کر رہے تھے، نے نہ صرف داستان گوئی پراجیکٹ میں بھرپور تعاون کی یقین دہانی کروائی بلکہ ادبِ اطفال کے فروغ کے لیے دیگر مشترکہ منصوبوں کی تجاویز بھی پیش کیں۔مزید برآں، پرائمری اسکولوں میں "لائبریری کارنرز" کے قیام کا فیصلہ بھی کیا گیا، تاکہ کم عمر بچوں کو بچپن سے ہی مطالعے کی جانب راغب کیا جا سکے۔

یہ کارنرز رنگین، پرکشش اور عمر کے مطابق کتب پر مشتمل ہوں گے۔اجلاس میں یہ بھی طے پایا کہ ادارہ تعلیم و آگاہی، ادارہ ترقی ادب، اور اردو سائنس بورڈ کے ساتھ اشتراک عمل کے ذریعے مختلف تعلیمی، ادبی اور تربیتی سرگرمیاں ترتیب دی جائیں گی۔اجلاس میں جن معزز اراکین نے شرکت کی ان میں اطہر علی خان (سابق ڈی جی پی آر)، محترمہ کنول آمین (وائس چانسلر فیصل آباد ویمن یونیورسٹی)، شاھد حسین (سابق ایم ڈی پیپرا)، ڈاکٹر نوشین فاطمہ، محترمہ رخشندہ کوکب (ڈائریکٹر لائبریری یو سی پی)اور محترمہ بیلا جمیل (ادارہ تعلیم و آگاہی)شامل تھیں۔

یہ اجلاس پنجاب میں علم و ادب کے فروغ کے حوالے سے ایک تازہ عزم، عملی منصوبہ بندی اور بین الادارہ جاتی تعاون کا مظہر تھا، جو مستقبل قریب میں نوجوان نسل کے لیے مثبت تبدیلیوں کا پیش خیمہ بنے گا۔