متحدہ عرب امارات، ابوظبی ایئرپورٹ پر مسافر کے معدے سے 5 ملین درھم کی کوکین برآمد

منگل 20 مئی 2025 08:40

دبئی (اُردو پوائنٹ اخبارتازہ ترین - اے پی پی۔ 20 مئی2025ء) متحدہ عرب امارات کےدارالحکومت ابوظبی کے زاید انٹرنیشنل ایئرپورٹ پر حکام نے منشیات سمگل کرنے کی بڑی کوشش ناکام بنائی ہے۔الامارات الیوم کے مطابق وفاقی اتھارٹی برائے شناخت و شہریت، کسٹمز اور بارڈرز سکیورٹی کے جنرل ڈائریکٹوریٹ نے ایک مسافر سے کوکین کے 89 کیپسول برآمد کیے جن کا مجموعی وزن تقریبا 1198 گرام اور انٹرنیشنل مارکیٹ میں قیمت 5 ملین درھم ہے۔

(جاری ہے)

کسٹم انسپکشن حکام کو جنوبی امریکی ملک سے آنے والے ایک مسافر پر شک ہوا، جدید سکیننگ ڈیوائسز کے ذریعے معائنہ کیا گیا تو جسم میں غیرمعمولی اشیا کی موجودگی کے آثار ظاہر ہوئے۔مسافر کو متعلقہ حکام کے حوالے کیا گیا جنہوں نے پیٹ میں چھپائے گئے 89 کیپسول برآمد کئے ۔اتھارٹی نے کسٹم انسپکشن حکام کی کاوشوں کو سراہتے ہوئے کہا کہ انہوں نے اپنے فرائض احسن طریقے سے انجام دیئے ۔اتھارٹی نے منشیات کے خطرات سے معاشرے کے تحفظ کو یقینی بنانے کے لیے اپنے عزم کا اعادہ کیا۔