امریکا‘ خاتون نے شوہر اور 2 بچوں کو قتل کرکے خود کشی کرلی

دونوں بچوں کو سر پر گولی ماری گئی جبکہ شوہر کو متعدد گولیاں لگیں‘ خاتون کا شوہر رائن لانگ کینسر کے آخری مراحل میں تھا

جمعرات 21 اگست 2025 21:26

امریکا‘ خاتون نے شوہر اور 2 بچوں کو قتل کرکے خود کشی کرلی

واشنگٹن (اُردو پوائنٹ اخبارتازہ ترین - آن لائن۔ 21 اگست2025ء)امریکی ریاست نیو ہیمپشائر میں ایک خاتون نے شوہر اور دو بچوں کو قتل کرکے خودکشی کرلی ہے۔امریکی میڈیا کے مطابق نیو ہیمپشائر کے علاقے میڈبوری میں ایک دل دہلا دینے والا واقعہ پیش آیا، جہاں خاتون نے اپنے شوہر اور دو کمسن بچوں کو گولی مارنے کے بعد اپنی جان لے لی۔امریکی اٹارنی جنرل کے دفتر کے مطابق 34 سالہ ایملی لانگ کی لاش گھر سے ملی جس نے سر پر خود کو گولی مار کر خودکشی کی۔

اس سے قبل اس نے اپنے شوہر 48 سالہ رائن لانگ اور دو بچوں 8 سالہ پارکر اور 6 سالہ رائن کو گولی مار کر ہلاک کیا۔

(جاری ہے)

تفتیشی رپورٹ کے مطابق دونوں بچوں کو سر پر گولی ماری گئی جبکہ شوہر کو متعدد گولیاں لگیں۔ خاتون کا شوہر رائن لانگ کینسر کے آخری مراحل میں تھا۔واقعے کی اطلاع ملنے کے بعد پولیس نے جائے وقوعہ پر پہنچ کر آلہ قتل برآمد کرلیا، جہاں پولیس کو ایک 3 سالہ بچہ بھی ملا جو واقعے میں محفوظ رہا، جسے اس کے رشتہ داروں کے حوالے کردیا گیا۔تحقیقات کے مطابق خودکشی کرنیوالی خاتون سوشل میڈیا پر اکثر اپنے ذہنی دباؤ اور شوہر کی بیماری سے متعلق مایوسی کا اظہار کرتی رہتی تھی۔ واقعے سے دو روز قبل بھی اس نے ایک ویڈیو پوسٹ کی تھی جس میں وہ اپنی مشکلات کا ذکر کر رہی تھیں۔