امریکی صدر ڈونلڈ ٹرمپ کا منشیات کی سمگلنگ کی روک تھام کیلئے وینزویلا کے ساحل کے قریب 3 جنگی جہاز تعینات کرنے کا فیصلہ

جمعرات 21 اگست 2025 14:55

واشنگٹن (اُردو پوائنٹ اخبارتازہ ترین - اے پی پی۔ 21 اگست2025ء) امریکی صدر ڈونلڈ ٹرمپ نے منشیات کی اسمگلنگ روکنے کے لیے وینزویلا کے ساحل کے قریب تین جنگی جہاز تعینات کرنے کا فیصلہ کیا ہے ۔اے ایف پی کی رپورٹ کے مطابق یہ اقدام اس وقت سامنے آیا ہے جب امریکی انتظامیہ نے وینزویلا کے صدر نکولس مادورو پر دباؤ بڑھاتے ہوئے رواں ماہ کے آغاز میں ان کے خلاف منشیات کے الزامات پر انعامی رقم دگنی کر کے 50 ملین ڈالر کر دی۔

ذرائع کے مطابق ایجیئس کلاس کے تین گائیڈڈ میزائل ڈسٹرائرز وینزویلا کے پانیوں کی جانب روانہ ہو گئے ہیں۔ امریکی میڈیا نے یہ بھی رپورٹ کیا ہے کہ امریکا خطے میں 4,000 میرینز بھیجنے کی تیاری کر رہا ہے۔امریکہ، جوصڈر مادورو کی گزشتہ دو انتخابی کامیابیوں کو تسلیم نہیں کرتا، ان پر الزام لگاتا ہے کہ وہ "کارٹیل ڈی لوس سولیس " نامی کوکین اسمگلنگ گینگ کی قیادت کر رہے ہیں۔

(جاری ہے)

گزشتہ ماہ امریکی محکمہ خزانہ نے اس گروپ کو خصوصی دہشت گرد تنظیم قرار دیا تھا اور الزام عائد کیا کہ یہ "ٹرین دے آراگوا" اور "سینالوا" ڈرگ کارٹیلز کی معاونت کر رہا ہے جنہیں رواں سال کے اوائل میں غیر ملکی دہشت گرد تنظیمیں قرار دیا گیا تھا۔وہائٹ ہاؤس کی پریس سیکرٹری کیرولین لیوٹ نے کہا کہ صدر ٹرمپ منشیات کی اسمگلنگ روکنے کے لیے امریکی طاقت کے ہر عنصر کو استعمال کرنے کے لیے تیار ہیں۔

انہوں نے کہا کہ صدر ٹرمپ بالکل واضح اور مستقل مؤقف رکھتے ہیں کہ وہ ان افراد کو انصاف کے کٹہرے میں لائیں گے جو امریکا میں منشیات لانے کے ذمہ دار ہیں۔انہوں نے وینزویلا کی حکومت کو "نارکو-ٹیرر کارٹیل" قرار دیا اور کہاکہ مادورو کوئی جائز صدر نہیں بلکہ اس کارٹیل کے مفرور سربراہ ہیں جن پر امریکا میں منشیات اسمگل کرنے کی فرد جرم عائد ہو چکی ہے۔دوسری جانب وینزویلا کے صدر مادورو نے اعلان کیا ہے کہ وہ امریکی خطرات کے مقابلے کے لیے ملک بھر میں 45 لاکھ ملیشیا اراکین کو تعینات کریں گے۔