محکمہ لائیوسٹاک کے پیراویٹرنری سٹاف کو70 موٹرسائیکلز دیے گئے ہیں ،ڈپٹی ڈائریکٹر لائیوسٹاک سمبڑیال

جمعہ 23 مئی 2025 16:04

سمبڑیال (اُردو پوائنٹ اخبارتازہ ترین - اے پی پی۔ 23 مئی2025ء) ڈپٹی ڈائریکٹر لائیوسٹاک سمبڑیال ڈاکٹر افضل نے کہا ہے کہ وزیراعلیٰ پنجاب مریم نواز شریف کی ہدایت کے مطابق محکمہ لائیوسٹاک کے پیراویٹرنری سٹاف کو70 موٹرسائیکلز دیے گئے ہیں جن کی مدد سے فارمرز کوگھر کی دہلیز پر جانوروں کے بروقت علاج معالجہ اور ویکسین لگانے کی سہولت دی جا سکے گی۔

انہوں نے کہا کہ اس سے ہمارے فارمرز کو زیادہ سے زیادہ سہولت میسر آسکے گی۔ ان خیالات کا اظہار انہوں نے موٹرسائیکلز تقسیم کے حوالے سے منعقدہ تقریب میں اے پی پی سے گفتگو کرتے ہوئے کیا۔ڈاکٹر افضل نے کہا کہ وزیراعلیٰ پنجاب مریم نواز شریف کے ویژن کے مطابق آج سمبڑیال میں ایک مقامی مارکی میں پیرا ویٹرنری سٹاف کو 70 موٹرسائیکلز دی جاچکی ہیں ، مریم نواز کا یہ ایک مثالی قدم ہے جسے بہت زیادہ سراہا جارہا ہے اور محکمہ لائیو سٹاک کے ڈاکٹرز و پیرا میڈیکل اسٹاف بے حد خوش ہے۔

(جاری ہے)

انہوں نے کہا کہ ان موٹرسائیکل میں ایمبولینس روٹر،لائوڈ اسپیکر، ویکسین کو ٹھنڈا رکھنے کیلئے کولر سسٹم ،ادویات کیلئے باکس اور ڈور سے بچنے کیلئے آگے تار بھی لگائے گئے ہیں۔انہوں نے کہا کہ اس سے پہلے ہمارے ڈاکٹرز جہاں جاتے تھے وہاں کی مسجد میں اعلانات کرواتے تھے اب لائوڈ اسپیکر کی مدد سے اعلان کرکے فارمرز کو آسانی سے بتایا جا سکے گا تاکہ وہ اپنے جانوروں کو ویسکین لگوا سکیں۔انہوں نے کہا کہ یہ موٹرسائیکلز تین سال کی آسان اقساط پر بلاسود دی جارہی ہیں، وزیراعلیٰ پنجاب کے ان اقدام کی بدولت فارمرز کو گھر کی دہلیز پر حفاظتی ویکسین اور ٹیکہ جات کی سہولت میسر آسکے گی۔