غیرقانونی حجاج کو پکڑنے کیلئے ڈرون کا استعمال شروع

حج سیزن کے دوران پرمٹ کے بغیر مکہ مکرمہ میں داخل ہونے والوں کی نگرانی کی جائے گی

ساجد علی ہفتہ 24 مئی 2025 12:44

مکہ مکرمہ ( اُردو پوائنٹ اخبارتازہ ترین۔ 24 مئی 2025ء ) سعودی عرب نے غیرقانونی حجاج کو پکڑنے کیلئے ڈرون کا استعمال شروع کردیا۔ عرب میڈیا کے مطابق سعودی عرب نے غیرقانونی طریقے سے حج کرنے والوں کے خلاف ڈرون ٹیکنالوجی کو بروئے کار لانے کا آغاز کردیا ہے، جس کے ذریعے حج سیزن کے دوران پرمٹ کے بغیر مکہ مکرمہ میں داخل ہونے والوں کی نگرانی کی جارہی ہے، جس کے نتیجے میں روزانہ سیکڑوں غیرقانونی حجاج کو گرفتار کیا جا رہا ہے۔

بتایا گیا ہے کہ حج سکیورٹی فورسز اور دیگر ادارے غیرقانونی طریقے سے مکہ مکرمہ داخل ہونے والوں کی نگرانی کے لیے جدید ٹیکنالوجی کا استعمال کر رہے ہیں، حج سکیورٹی فورسز کی مختلف ٹیمیں زمین کے علاوہ فضائی نگرانی بھی جامع انداز میں کر رہی ہیں، یہ جدید نظام غیرقانونی حجاج کو پہچاننے اور انہیں روکنے میں انتہائی مؤثر ثابت ہو رہا ہے، ڈرونز کی مدد سے ناصرف مکہ کی گلیوں بلکہ پہاڑی راستوں پر بھی کڑی نگرانی کی جاسکتی ہے جہاں سے غیرقانونی حجاج داخل ہونے کی کوشش کرتے ہیں۔

(جاری ہے)

معلوم ہوا ہے کہ جدید ٹیکنالوجی استعمال کرتے ہوئے مکہ مکرمہ کے چاروں اطراف میں ڈرونز کا استعمال کیا جا رہا ہے تاکہ چور راستوں کا استعمال کرنے والوں کو مکہ مکرمہ داخل ہونے سے روکا جا سکے، حج ٹاسک فورسز کی ٹیمیں فضائی نگرانی کے لیے خصوصی ڈرونز استعمال کر رہی ہیں جن میں انتہائی جدید اور حساس کیمرے نصب ہیں جن کے ذریعے رات کے وقت بھی بہتر طورپر راستوں کی نگرانی کی جا سکتی ہے، ڈرونز نگران سینٹر کو موصول ہونے والی وڈیو کے ذریعے گراؤنڈ کنٹرول ٹاور کو مطلع کیا جاتا ہے جو قریب ترین پولیس پارٹی کو لوکیشن کے بارے میں مطلع کرتی ہیں تاکہ غیرقانونی طورپر مکہ میں داخل ہونے والوں کو روکا جائے۔