امریکی ایئر لائنز کی پرواز میں کبوتروں کا ہنگامہ‘پرواز غیرمعمولی صورتحال کا شکار

بدھ 28 مئی 2025 22:05

واشنگٹن (اُردو پوائنٹ اخبارتازہ ترین - آن لائن۔ 28 مئی2025ء)امریکا میں ڈیلٹا ایئر لائنز کی ایک مسافر بردار پرواز ایک غیر معمولی صورتِ حال سے دوچار ہو گئی، دو کبوتر جہاز کے اندر گھس آئے اور اڑان سے قبل ہنگامہ برپا ہوگیا۔ واقعہ ہفتے کے روز منیاپولس سینٹ پال انٹرنیشنل ایئرپورٹ پر پیش آیا، جہاں وسکونسن جانے والی پرواز کو پرندوں کی موجودگی کے باعث کچھ دیر کیلئے مؤخر کرنا پڑا۔

ایک مسافر نے میڈیا سے گفتگو کرتے ہوئے بتایا کہ جب میں جہاز میں داخل ہوا تو سب کچھ نارمل لگ رہا تھا، پھر ایک خاتون نے فلائٹ اٹینڈنٹ کو بتایا کہ میرا خیال ہے کہ جہاز میں ایک کبوتر ہے۔انہوں نے کہا کہ جلد ہی پائلٹ نے اعلان کیا کہ خواتین و حضرات، ہمیں جہاز میں وائلڈ لائف کی صورتِ حال درپیش ہے۔

(جاری ہے)

پہلا کبوتر تو خاموشی سے نشستوں کے نیچے چل رہا تھا، لیکن دوسرے کبوتر نے پرواز کے اڑان بھرنے سے قبل اُڑان بھر لی، جس سے مسافروں میں خوف و ہراس پیدا ہو گیا، ایک مسافر نے پرندے کو جیکٹ سے پکڑنے کی کوشش بھی کی۔

پائلٹ نے جہاز واپس گیٹ پر لے جا کر عملے کو بلایا، جنہوں نے دونوں کبوتروں کو بحفاظت باہر نکالا، پرواز کو کچھ وقت کی تاخیر کے بعد دوبارہ روانہ کیا گیا۔ترجمان ڈیلٹا ایئرلائنز کا مؤقف ہے کہ ہم اپنے عملے اور مسافروں کی ذمہ دارانہ کارروائیوں کو سراہتے ہیں اور اس واقعے کی وجہ سے ہونے والی تاخیر پر معذرت خواہ ہیں۔یہ ویڈیوز سوشل میڈیا پر تیزی سے وائرل ہوئیں، صارفین نے دلچسپ تبصرے کرتے ہوئے کہا کہ یہ ڈیلٹا ایئر لائنز تھی یا کبوتر پارک کیا اب پرندے بھی ہوائی سفر کے شوقین ہوگئے ہیں جہاز کا ٹکٹ انسانوں کے ساتھ پرندوں کے لیے بھی دستیاب ہے کیا