ڈی جی ٹی او کا فیصلہ برقرار‘سیکریٹری کامرس نے لاہور چیمبر کے 2024 انتخابات کو شفاف اور قانون کے مطابق قرار دیدیا: صدر لاہور چیمبرمیاں ابوذر شاد

لاہور (اُردو پوائنٹ اخبارتازہ ترین - آن لائن۔ 29 مئی2025ء) سیکریٹری کامرس نے ڈائریکٹر جنرل ٹریڈ آرگنائزیشنز کا فیصلہ برقرار رکھتے ہوئے لاہور چیمبر آف کامرس اینڈ انڈسٹری کے 2024 میں منعقد ہونے والے انتخابات کو مکمل طور پر شفاف اور قواعد و ضوابط کے مطابق قرار دیا ہے۔یہ بات لاہور چیمبر میں ایک پریس کانفرنس سے خطاب کرتے ہوئے صدر لاہور چیمبر میاں ابوذر شاد، سینئر نائب صدر انجینئر خالد عثمان، نائب صدر شاہد نذیر چوہدری، سابق صدور میاں انجم نثار اور محمد علی میاں، سابق سینئر نائب صدر علی حسام اصغر، سابق نائب صدر فہیم الرحمن سہگل اور چیف الیکشن کمشنر نصراللہ مغل نے بتائی۔

اس موقع پر ایگزیکٹو کمیٹی کے اراکین بھی موجود تھے۔انہوں نے کہا کہ ہم اللہ تعالیٰ کا بے شمار شکر ادا کرتے ہیں جس نے ایک مرتبہ پھر ہمیں سرخرو کیا۔

(جاری ہے)

انہوں نے کہا کہ لاہور چیمبر کے انتخابات 23 اور 24 ستمبر 2024 کو منعقد ہوئے جن میں لاہور کی کاروباری برادری نے بھرپور شرکت کر کے پی پی پی الائنس کو تاریخی کامیابی سے نوازا۔ کاروباری برادری نے جمہوری عمل میں بھرپور حصہ لیتے ہوئے اپنے نمائندوں کا انتخاب کیا۔

انہوں نے کہا کہ اگرچہ کاروباری برادری نے انتخابی دنوں میں ہی اپنا فیصلہ سنا دیا تھا لیکن چند افراد نے نتائج کو متنازعہ بنانے کے لیے ڈی جی ٹی او کے پاس رجوع کیا۔انہوں نے کہا کہ ڈی جی ٹی او نے دونوں فریقین کا مؤقف نہایت تحمل، غیرجانبداری اور دیانتداری سے سنا۔ تمام ثبوت، دستاویزات، ویڈیوز اور انتخابی ریکارڈ کا باریک بینی سے جائزہ لیا اور ایک تفصیلی فیصلے میں اعلان کیا کہ لاہور چیمبر کے انتخابات مکمل طور پر شفاف، منصفانہ اور قواعد کے مطابق ہوئے۔

انہوں نے کہا کہ انصاف کے تقاضے پورے کرتے ہوئے ڈی جی ٹی او نے دوبارہ گنتی کا حکم دیا جسے ہم نے خوش دلی سے قبول کیا۔ دوبارہ گنتی کے بعد بھی وہی نتیجہ آیا جو 23 اور 24 ستمبر کو سامنے آیا تھا۔انہوں نے مزید کہا کہ اس کے باوجود مخالف گروپ نے سیکریٹری کامرس سے رجوع کیا۔ ہم سیکریٹری کامرس کو خراج تحسین پیش کرتے ہیں جنہوں نے چھ گھنٹے تک سماعت کی، دونوں فریقین کو تفصیل سے سنا، تمام شواہد اور زمینی حقائق کا تجزیہ کیا اور آخرکار ڈی جی ٹی او کے فیصلے کو برقرار رکھا۔

انہوں نے کہا کہ یہ فیصلہ کسی ایک گروپ کی نہیں بلکہ اصولوں، جمہوریت اور ادارہ جاتی دیانتداری کی فتح ہے۔ یہ اس بات کا ثبوت ہے کہ ہمارے ادارے مضبوط ہو رہے ہیں، نظام فعال ہے اور سچ کبھی چھپ نہیں سکتا۔انہوں نے کہا کہ ہم اقتدار یا عہدوں کے طلبگار نہیں بلکہ خدمت کے جذبے کے ساتھ آئے ہیں۔ کاروباری برادری نے ہم پر جو اعتماد کیا ہے وہ ہمارے لیے ایک مقدس امانت ہے۔

انہوں نے کہا کہ ہمیں کسی سے ذاتی دشمنی نہیں لیکن اگر کوئی چیمبر کے نظام کو کمزور کرنے کی کوشش کرے گا تو ہم آئین و قانون کے دائرہ کار میں رہتے ہوئے اس کا مؤثر جواب دیں گے۔آخر میں، انہوں نے اپنی ٹیم، سپورٹرز، ووٹرز، بزنس لیڈرز اور بزرگوں کا دل کی گہرائی سے شکریہ ادا کیا اور کہا کہ یہ کامیابی ہم سب کی ہے اور اب ہمیں متحد ہو کر آگے بڑھنا ہے۔