مردان، ٹریفک روانی کو یقینی بنانے کیلئے 200 سے زائد ٹریفک اہلکار اور 14 ایگل اسکواڈ ٹیمیں تعینات کرنے کا فیصلہ

پشاور (اُردو پوائنٹ اخبارتازہ ترین - اے پی پی۔ 30 مئی2025ء) مردان میں عید الاضحیٰ اور عمومی دنوں میں ٹریفک روانی کو یقینی بنانے کےلیے 200 سے زائد ٹریفک اہلکار اور 14 ایگل اسکواڈ ٹیمیں تعینات کرنے کا فیصلہ کیا گیا ہے۔ مردان پولیس کے مطابق ضلعی پولیس سربراہ ظہور بابر آفریدی کی زیر صدارت ایک اہم اجلاس منعقد ہوا جس میں ایس پی ٹریفک محمد سعید خان، ڈی ایس پی ٹریفک محمد ریافت خان اور انچارج ٹریفک عمران خان نے شرکت کی۔

اجلاس کا مقصد عید الاضحیٰ کے موقع پر اور دیگر عمومی دنوں میں شہر کے مختلف علاقوں میں ٹریفک کے نظام کو بہتر بنانا اور عوام کو سفر میں آسانی فراہم کرنا تھا۔ ڈی پی او مردان نے افسران کو واضح اور سخت ہدایات جاری کیں کہ وہ ٹریفک کے بہاؤ کو بلا تعطل برقرار رکھنے کے لیے تمام ممکنہ اقدامات کریں۔

(جاری ہے)

انہوں نے کہا کہ قربانی کے جانوروں کی منڈیوں، بازاروں، خاص طور پر عید کی خریداری کے دوران مصروف علاقوں اور دیگر اہم جگہوں پر خصوصی انتظامات کیے جائیں تاکہ ٹریفک جام کی صورتحال پیدا نہ ہو اور شہریوں کو آمد و رفت میں کوئی دشواری نہ ہو۔

اس کے علاوہ غیر قانونی پارکنگ، تجاوزات اور ٹریفک قوانین کی خلاف ورزی پر فوری اور مؤثر کارروائی کی جائے تاکہ روزمرہ کے معمولات میں بھی ٹریفک کا بہاؤ جاری رہے۔ اجلاس میں فیصلہ کیا گیا کہ شہر کے اہم راستوں اور مصروف علاقوں میں 200 سے زائد ٹریفک وارڈنز، 4 ٹریفک اسسٹنٹ سب انسپکٹرز، 5 پک اپ گاڑیاں، 5 فورک لفٹرز اور 14 ایگل اسکواڈ ٹیموں کو تعینات کیا جائے گا، یہ تمام نفری اور گاڑیاں رنگ روڈ، کاٹلنگ روڈ نزد بائزئی سی این جی، تخت بھائی، شیرگڑھ، شہباز گڑھی منڈی، عید کی خریداری کے بازار اور مویشی منڈیوں جیسے حساس مقامات پر تعینات رہیں گی تاکہ ٹریفک کا بہاؤ روانی سے چلتا رہے اور کسی بھی غیر قانونی تجاوزات کی روک تھام کی جا سکے۔

اس کے علاوہ کسی بھی غیر قانونی مویشی منڈی کی اجازت نہیں دی جائے گی اور خلاف ورزی کی صورت میں سخت قانونی کارروائی کی جائے گی۔ ڈی پی او مردان نے کہا کہ عوام کی جانب سے بڑھتی ہوئی عید کی خریداری کے باعث شہر میں ٹریفک کے حجم میں اضافہ متوقع ہے، اس لیے ہر جگہ موثر ٹریفک انتظامات انتہائی ضروری ہیں تاکہ شہریوں کو بہترین سفری سہولیات فراہم کی جا سکیں۔

انہوں نے افسران کو ہدایت کی کہ وہ شہریوں کے ساتھ حسن سلوک اور خوش اخلاقی سے پیش آئیں اور ہر جگہ پیشہ ورانہ رویہ اختیار کریں۔ بہتر ٹریفک نظام نہ صرف عید کے دوران بلکہ ہر وقت برقرار رہنا چاہیے تاکہ ایک مہذب اور منظم معاشرے کا قیام ممکن ہو۔ ضلعی پولیس مردان کی جانب سے شہریوں سے اپیل کی گئی ہے کہ وہ پولیس اور ٹریفک اہلکاروں کا تعاون کریں، ٹریفک قوانین کی پابندی کریں اور رواداری کا مظاہرہ کرتے ہوئے سفر کریں تاکہ عید کا یہ تہوار خوشگوار، محفوظ اور پُرامن طریقے سے منایا جا سکے۔