گلوکار ، کمپیئر، اداکار ، کالم نگاراور سیاست دان عنایت حسین بھٹی کی برسی ہفتہ کو منائی گئی

ہفتہ 31 مئی 2025 14:00

اسلام آباد (اُردو پوائنٹ اخبارتازہ ترین - اے پی پی۔ 31 مئی2025ء) گلوکار ، کمپیئر، اداکار ، کالم نگاراور سیاست دان عنایت حسین بھٹی کی برسی ہفتہ 31 مئی کو منائی گئی۔ عنایت حسین بھٹی 12 جنوری 1928ء کو ضلع گجرات میں پیدا ہوئے۔انہوں نے اپنی فلمی زندگی کا آغاز بطور گلوکارکیا اور فلم ہیر، پھیرے، لارے اور شمی وغیرہ میں ان کے گائے ہوئے نغمات بے حد مقبول ہوئے تھے۔

1953ء میں فلم شہری بابو میں انہوں نے ایک فقیر منش سائیں کا کردار ادا کیا جس پر انہی کا گایا ہوا نغمہ بھاگاں والیو نام جپو مولا نام فلم بند ہوا اور پھر یہی نغمہ ان کی شناخت بن گیا۔1955ء میں شباب کیرانوی نے اپنی فلم جلن میں انھیں مرکزی کردار ادا کرنے کی پیشکش کی۔ اس کے بعد انھوں نے ایک طویل عرصہ تک فلموں میں مرکزی کردار ادا کیا۔

(جاری ہے)

ان کی بطور اداکار فلموں کی کل تعداد 54 تھی جس میں 52 فلمیں پنجابی زبان میں بنائی گئی تھیں۔

عنایت حسین بھٹی کی آخری فلم عشق روگ 1989ء میں نمائش پزیر ہوئی۔عنایت حسین بھٹی نے 1985ء کے عام انتخابات میں قومی اسمبلی کی نشست پر انتخاب میں بھی حصہ لیا مگر کامیاب نہ ہو سکے ۔ مشہور فلمی اداکار کیفی ان کے بھائی، ٹیلی وژن کے مشہور فن کار وسیم عباس ان کے صاحبزادے اور ٹیلی وژن ہی کے ایک اور اداکار آغا سکندر ان کے داماد تھے۔عنایت حسین بھٹی 31 مئی، 1999ء کو گجرات میں وفات پاگئے۔ ان کی برسی کے موقع پر شو بز انڈسٹری اور فنکار برادری نے ان کی خدمات پر خراج تحسین پیش کیا۔