ریسکیو 1122فیصل آباد کی ماہانہ کارکردگی رپورٹ، مئی میں 14060 افراد کو مدد فراہم کی

اتوار 1 جون 2025 23:20

فیصل آباد (اُردو پوائنٹ اخبارتازہ ترین - اے پی پی۔ 01 جون2025ء) ریسکیو 1122فیصل آباد نے ماہانہ کارکردگی رپورٹ مئی 2025 جاری کردی۔ ریسکیو 1122 فیصل آباد نے گزشتہ ماہ 13960 ایمرجنسی کالز پر بروقت رسپانس کرتے ہوئے 14060 افراد کو مدد فراہم کی ۔ ترجمان زاہد لطیف نے بتایا کہ ماہِ مئی میں ریسکیو 1122 فیصل آباد نے 13960 ایمرجنسی کالز پر بروقت رسپانس کرتے ہوئے 14060 افراد کو مدد فراہم کی۔

ریسکیو 1122 کنٹرول روم کو 13960 ایمرجنسی کالز موصول ہوئیں۔ ریسکیو ٹیمز نے بروقت موقع پر پہنچ کر 2671 روڈ ٹریفک ایکسیڈنٹ ، 9376 میڈیکل، 300 آگ لگنے، 360 کرائم، 15 ڈوبنے، 13 عمارت گرنےاور 1126 دیگر متفرق ایمرجنسیز پر رسپانس کیا. آگ لگنے کے واقعات کے دوران فوری آگ پر قابو پاتے ہوئے تقریبا 78 کروڑ سے ذائد کی املاک کو نقصان سے بچایا۔

(جاری ہے)

انسانی خدمت کے ساتھ ساتھ 99 کالز پر پرندوں اور جانوروں کو بھی ریسکیو کیا گیا۔

ترجمان بتایا کہ نہروں میں ڈوبنے کے بڑھتے ہوئے واقعات کے پیش نظر ڈسٹرکٹ ایمرجنسی آفیسر نے اپنے پیغام میں کہا ہے کہ موسم گرما کی تعطیلات کے دوران شدید گرمی کے باعث بچے نہروں کا رخ کرتے ہیں نہر میں نہانا خطرے سے خالی نہیں لیکن چھوٹے بڑے اس کی پرواہ کیے بغیر نہر میں کود جاتے ہیں اس کے علاوہ کرتب دکھاتے ہوئے پل سے چھلانگ لگاتے ہیں اور کبھی درخت پر چڑھ کر نہر میں کودتے ہیں۔

پانی کے تیز بہاؤ کی وجہ سے انسان کہیں سے کہیں نکل جاتا ہے یہی وجہ ہے کہ ہر سال اس موسم میں کئی نا خوشگوار واقعات بھی پیش آتے ہیں۔ نہر میں نہاتے ہوئے اکثر بچے اور بڑے اپنی جان گنوا بیٹھتے ہیں نہر میں یہ اندازہ لگانا انتہائی مشکل ہوتا ہے کہ پانی کس طرف زیادہ گہرا ہے لوگ اپنی جان کی پرواہ کیے بغیر گہرے پانی میں چلے جاتے ہیں اور بعض اوقات گہری دلدل میں پھنس جاتے ہیں لاکھ کوشش کے باوجود بھی اپنے آپ کو بچا نہیں پاتے۔ میری تمام والدین سے گزارش ہے کہ اپنے بچوں کو نہروں میں نہانے سے روکیں تاکہ کسی قسم کے نا خوشگوار واقعہ سے بچا جا سکے۔۔