آن لائن مالیاتی اور بینکنگ فراڈ کے واقعات میں تشویشناک اضافہ،اسٹیٹ بینک نے مالیاتی فراڈ کا نوٹس لے لیا

اتوار 17 اگست 2025 16:00

کراچی(اُردو پوائنٹ اخبارتازہ ترین - این این آئی۔ 17 اگست2025ء)آن لائن مالیاتی فراڈ اور بینکنگ دھوکہ دہی کے بڑھتے واقعات نے خطرے کی گھنٹی بجادی ، اسٹیٹ بینک نے جامع سائبر سیکیورٹی حکمتِ عملی بنانے کا فیصلہ کر لیا۔ تمام بینکوں اور مالیاتی اداروں کیلئے سخت اور مضبوط سیکیورٹی فریم ورک لازم ہوگا۔ مرکزی بینک حکومت اور قانون نافذ کرنے والے اداروں کے ساتھ مل کر بڑے پیمانے پر اقدامات کرے گا۔

اسٹیٹ بینک آف پاکستان نے آن لائن مالیاتی فراڈ اور بینکنگ دھوکہ دہی کے بڑھتے واقعات نوٹس لیتے ہوئے سخت اقدامات کی ٹھان لی۔ تمام بینکوں اور مالیاتی اداروں کیلئے جدید سائبر سیکیورٹی فریم ورک کی تیاری شروع ۔ پبلک پرائیویٹ شراکت داری کو اس حکمتِ عملی کا بنیادی ستون قرار دیا گیا ہے تاکہ ملک بھر کے مالیاتی نظام کو سائبر حملوں سے محفوظ بنایا جا سکے۔

(جاری ہے)

اسٹیٹ بینک حکام نے واضح کیا ہے کہ حکومتی اور قانون نافذ کرنے والے اداروں کے ساتھ تعاون بڑھایا جائے گا۔ سائبر خطرات سے نمٹنے کیلئے معلومات کا بروقت تبادلہ اور مشترکہ مشقیں مجوزہ حکمت عملی کا حصہ۔ سائبر سیکیورٹی اسٹریٹجی کو جلد حتمی شکل دے کر محفوظ ترین مالیاتی نظام تیار کیا جائے گا۔ جدید تصدیقی ٹیکنالوجی، صارفین کی پرائیویسی کا تحفظ، عملے کی تربیت اور عوامی آگاہی مہمات شامل ۔

سائبر حملوں کی فوری نشاندہی اور بروقت سد باب پر بھی خصوصی توجہ دی جائے گی۔اسٹیٹ بینک کے مطابق تمام مالیاتی اداروں کیلئے مضبوط سیکیورٹی کنٹرولز کا نفاذ لازمی ہوگا۔ ہر ادارے کیلئے سائبر رسک اسیسمنٹ اور حملوں کو کنٹرول کرنے کا جدید نظام رکھنا لازم۔ ان تمام اقدامات کا مقصد آن لائن بینکنگ، موبائل منی ٹرانسفر اور ای کامرس پر عوامی اعتماد بحال کرتے ہوئے شہریوں کے سرمائے کا تحفظ یقینی بنانا ہے۔