رحیم یار خان،غربت سے تنگ باپ کی قوت گویائی سے محروم بچوں سمیت خود کشی کی کوشش،بچوں کی حالت تشویشناک

رحیم یارخان(اردوپوائنٹ اخبار تازہ ترین۔02 جون 2025)پنجاب کے علاقے رحیم یار خان میں غربت سے تنگ باپ کی اپنے قوت گویائی سے محروم بچوں سمیت خود کشی کی کوشش،بچوں کی حالت تشویشناک جنہیں فوری طور پر شیخ زید ہسپتال منتقل کر دیا گیا ہے،ریسکیو حکام کا کہنا ہے کہ واقعے کی اطلاع ملتے ہی فوری طور پر جائے وقوع پر پہنچ کر ابتدائی طبی امداد دی گئی اور متاثرین کو ہسپتال منتقل کیا گیا۔

بتایا گیا ہے کہ رحیم یار خان کی بستی پیر بخش چاچڑ میں غربت سے تنگ آ کر ایک باپ نے اپنے بچوں کو زہریلی گولیاں کھلا کر خود بھی خودکشی کی کوشش کی۔ریسکیو 1122 کے مطابق 32 سالہ عبدالرحمن نے گندم میں رکھی جانے والی زہریلی گولیاں کھا کر خودکشی کی کوشش کی اور یہی زہریلی گولیاں بچوں کو بھی دیں۔

(جاری ہے)

بچوں میں 11 سالہ عمیر، 9 سالہ سفیان اور 4 سالہ بیٹی آصفہ شامل ہیں۔

عبدالرحمان کے دونوں بیٹے پیدائشی طور پر قوت گویائی سے محروم ہیں جس کے باعث وہ شدید ذہنی دباو کا شکار تھا۔واقعے کے بعد اہل علاقہ نے فوری طور پر متاثرہ خاندان کو  ہسپتال منتقل کیا جہاں چاروں کی حالت تشویشناک بتائی جا رہی ہے۔ ڈاکٹروں کے مطابق تمام افراد کو انتہائی نگہداشت میں رکھا گیا ہے۔اہلِ علاقہ کے مطابق عبدالرحمان طویل عرصے سے معاشی تنگدستی کا شکار تھا۔

واقعے کے بعد علاقے میں افسوس اور تشویش کی لہر ہے۔واضح رہے کہ اس سے قبل بھی خیبر پختونخوا ہ کے ضلع صوابی کے علاقے یارحسین صوابی میں افسوس ناک واقعہ پیش آیاتھا جہاں درندہ صفت باپ نے چار بچوں کو ذبح کر کے خودکشی کر لی تھی۔ریسکیو کے مطابق یارحسین سڑہ چینہ کے علاقے میں گھر کے اندر باپ نے دو بیٹوں اور دو بیٹیوں کو ذبح کر کے بعد زندگی کا خاتمہ کر لیا تھا۔

مقامی ذرائع اور ریسکیو حکام کے مطابق خود کشی کرنے والے شوہر کی رات کو بیوی کے ساتھ لڑائی ہوئی تھی۔ لاشوں کو یارحسین ہسپتال منتقل کردیا گیا، مقتولین میں دو بھائی اور دو بہنیں شامل ہیں، ملزم کی بیوی میکے میں ناراض بیٹھی تھی۔ریسکیواہلکاروں کا کہنا تھا کہ ناراض بیوی کو منانے کیلئے کافی جرگے بھی کئے گئے تھے۔بیوی راضی نہ ہوئی تو ظالم شوہر نے بچوں کو قتل کرکے اپنی زندگی کا بھی خاتمہ کیا۔

پولیس کے مطابق لاشوں کو قبضے میں لے کر ہسپتال منتقل کردیا گیاتھا۔ واقعے میں جاں بحق بچوں میں ضیاءاسلام عمر 12سال ،عبدالرحمان 10سال ،ثناءعمر 8 سال اور ایک 2 سال کی بچی شامل تھی۔قبل ازیں بھی کسووال میں دو افراد نے خود کشی کر لی، کسووال میں اللہ دتہ نامی شخص کی گھریلو ناچاکی پر اپنی بیوی سے تلخ کلامی ہوئی تھی جس پر اللہ دتہ نے مبینہ طور پر زہریلی دوائی پی کر خودکشی کرلی تھی۔