جنگ میں غیبی مدد حاصل تھی، بھارت کے 6 طیاروں کے تباہ ہونے کی وڈیوز ہمارے پاس ہیں، وزیرداخلہ

بھارتی طیارے گرانے کے بعد ہی یہ فیصلہ کیا تھا کہ ثبوت آنے تک اعلان نہیں کریں گے، بھارت کے طیارے گرنے کے ثبوت منٹوں میں ہمارے پاس آئے جس کا آج اعلان کر رہا ہوں؛ محسن نقوی کا سیمینار سے خطاب

Sajid Ali ساجد علی اتوار 17 اگست 2025 18:36

جنگ میں غیبی مدد حاصل تھی، بھارت کے 6 طیاروں کے تباہ ہونے کی وڈیوز ہمارے ..
لاہور ( اُردو پوائنٹ اخبارتازہ ترین۔ 17 اگست 2025ء ) وفاقی وزیر داخلہ محسن نقوی کا کہنا ہے کہ رواں برس مئی میں ہونے والی جنگ میں بھارت کے تمام 6 طیاروں کے تباہ ہونے کی ویڈیوز ہمارے پاس موجود ہیں۔ لاہور میں سیمینار سے خطاب کرتے ہوئے انہوں نے کہا کہ بھارت نے ہماری ایک بیس پر 7 میزائل فائر کیے لیکن ان میں سے ایک بھی بیس کے اندر نہیں گرا، پاکستان نے بھارت کے سب سے بڑے آئل سٹوریج پر میزائل فائر کیے، بھارت کی بہت سی چیزیں ٹارگٹ پر تھیں اور ہم مزید حملے کرسکتے تھے لیکن ہماری کوشش تھی کہ بھارت کو ڈرامہ کرنے کا موقع نہ دیں، بھارتی طیارے گرانے کے بعد ہی یہ فیصلہ کیا تھا کہ ثبوت آنے تک اعلان نہیں کریں گے، بھارت کے طیارے گرنے کے ثبوت منٹوں میں ہمارے پاس آئے جس کا آج اعلان کر رہا ہوں۔

(جاری ہے)

وزیرداخلہ کا کہنا ہے کہ اس جنگ میں ہمیں اللہ کی غیبی مدد حاصل تھی، پاک فوج، ایئر فورس اور بحریہ نے ایک حکمت علمی کے تحت جنگ لڑی، فیلڈ مارشل جنرل عاصم منیر اور وزیراعظم شہباز شریف کو کریڈٹ جاتا ہے کہ انہوں نے اس پریشر کو قبول کیا اور بھارت کو بھرپور جواب دیا، چند لوگ اس موقع پر بھی انٹیلی جنس ایجنسیز کو برا بھلا کہنے سے باز نہیں آتے، انٹیلی جنس ایجنسیز نے پاک بھارت جنگ میں پس پردہ بہترین کام کیا، بھارت کا ایک ایک فیصلہ ہماری انٹیلی جنس ایجنسیز کے پاس ہوتا تھا۔

محسن نقوی نے کہا کہ بھارت مرسڈیز اور پاکستان ڈمپر کی طرح ہے اور یہ ڈمپر بھی پتھروں اور مٹی سے لدا ہوا ہے، جب مرسڈیز اور ڈمپر کی ٹکر ہوگی تو سمجھ لیں کہ کیا ہوگا یہی بھارت کے ساتھ ہوا، اس جنگ میں پاکستان میں مثالی اتحاد دیکھا گیا اور تمام سیاسی جماعتیں اختلافات بھلا کر اکٹھی تھیں، دوسری جانب بھارت کا آرمی چیف اور ایئر چیف الگ الگ مودی سے مل رہے تھے، پہلگام فالس فلیگ آپریشن ڈرامے اور پاک بھارت جنگ کے پیچھے اجیت دوول اور میت شاہ کا کردار تھا یہ دونوں مودی کے ساتھ بھارت کو بھی لے ڈوبیں گے۔

ان کا کہنا ہے کہ بھارت اس وقت پاکستان میں کھلے عام دہشتگردی میں ملوث ہے اور تمام دہشتگرد سرگرمیوں کا سب سے بڑا مفاد بھارت نے حاصل کیا، بھارت بلوچستان میں دہشت گردی کے لیے کے لیے کالعدم بی ایل اے کی پشت پناہی کر رہا ہے، بھارت کھلے عام بلوچستان میں دہشت گردی کروا رہا ہے، ہم کشمیر کا پیچھا اس وقت تک کریں گے جب تک کشمیریوں کوان کا حق نہیں ملتا۔