بڈھ بیر پشاور میں سفاک بیٹے نے ماں کو قتل کر دیا

مقتولہ عاصمہ نے اپنے بیٹے کو اوباش لڑکوں سے دور رہنے کی نصیحت کی تھی حبیب اللہ نے ماں کو گولی مار دی، پولیس

پیر 2 جون 2025 14:47

پشاور(اُردو پوائنٹ اخبارتازہ ترین - این این آئی۔ 02 جون2025ء)خیبر پختونخوا کے علاقے بڈھ بیر میں افسوسناک واقعہ پیش آیا جہاں بیٹے نے والدہ کی نصیحت پر مشتعل ہو کر فائرنگ کر کے اسے قتل کر دیا۔ پولیس کے مطابق واقعہ اس وقت پیش آیا جب عاصمہ بی بی نے اپنے بیٹے حبیب اللہ کو اوباش لڑکوں کی صحبت سے دور رہنے کی تلقین کی۔

(جاری ہے)

پولیس کا کہنا ہے کہ نوجوان حبیب اللہ نے بار بار کی نصیحتوں سے تنگ آکر اپنی والدہ کو کمرے میں بند کیا اور گولی مار دی۔

فائرنگ سے شدید زخمی ہونے والی عاصمہ بی بی کو فوری طور پر تشویشناک حالت میں اسپتال منتقل کیا گیا، تاہم وہ راستے میں ہی دم توڑ گئیں۔واقعے کے بعد ملزم حبیب اللہ جائے وقوعہ سے فرار ہو گیا۔ پولیس نے ملزم کی تلاش کے لیے کارروائی شروع کر دی ہے۔ علاقے میں واقعے کے بعد خوف و ہراس پھیل گیا، جبکہ اہلِ محلہ نے اس سانحے پر گہرے دکھ اور افسوس کا اظہار کیا ہے۔