الشیخ عبدالرحمن السدیس کا حج سیکیورٹی فورسز کو خراج تحسین، حرمین شریفین کے تقدس پر زور

پیر 2 جون 2025 19:00

مکہ مکرمہ (اُردو پوائنٹ اخبارتازہ ترین - اے پی پی۔ 02 جون2025ء) حرمین شریفین کے امور کے سربراہ اور امامِ کعبہ شیخ ڈاکٹر عبدالرحمن السدیس نے حج کے دوران سعودی سیکیورٹی اداروں کی پیشہ ورانہ مہارت اور بھرپور تیاریوں کو سراہتے ہوئے ان کے کردار کو حرمین شریفین کے تقدس اور حجاج کرام کی حفاظت کے لیے نہایت اہم قرار دیا ہے۔ذرائع ابلاغ کے مطابق سالانہ حج سے قبل اپنے بیان میں انہوں نے کہا کہ حرمین شریفین کا تحفظ ایک سرخ لکیر ہے جسے کسی صورت عبور نہیں کیا جا سکتا۔

ہمارا ملک — اللہ اس کی حفاظت فرمائے — ان تمام عناصر سے سختی سے نمٹے گا جو اللہ کے مہمانوں کے امن و سلامتی میں خلل ڈالنے کی کوشش کریں گے۔ڈاکٹر السدیس نے سیکیورٹی فورسز کے جذبۂ خدمت کو امت مسلمہ کے لیے باعثِ فخر قرار دیا۔

(جاری ہے)

انہوں نے کہا کہ یہ اہلکار اللہ کے مہمانوں کی خدمت، ان کی حفاظت اور اطمینان کو یقینی بنانے کے لیے شب و روز مستعد رہتے ہیں، جو کہ ان کی انتھک محنت اور خلوص کا ثبوت ہے۔

"انہوں نے کہا: "ہم اللہ تعالیٰ کا شکر ادا کرتے ہیں کہ اس نے اس سرزمین کو امن و استحکام سے نوازا اور اسے ایسی دانا قیادت عطا فرمائی جو حجاج کرام کی خدمت کے لیے ہر ممکن وسائل مہیا کرتی ہے ۔شیخ السدیس نے حجاج کرام سے اپیل کی کہ وہ سیکیورٹی اہلکاروں کے ساتھ بھرپور تعاون کریں اور حج کے دوران تمام ضوابط و قوانین کی مکمل پابندی کریں۔ انہوں نے واضح کیا کہ حج ایک روحانی فریضہ ہے، اسے کسی بھی سیاسی، فرقہ وارانہ یا نسلی نعروں کے لیے استعمال نہیں کیا جانا چاہیے۔

انہوں نے قرآنِ مجید کی آیت کا حوالہ دیتے ہوئے کہا: "حج کے دنوں میں کوئی فحش بات، گناہ یا جھگڑا نہ کرے (البقرہ 197)، اور نبی کریم ﷺ کا ارشاد نقل کیا: جس نے حج کیا اور فحش گوئی، گناہ اور جھگڑے سے بچا، وہ ایسے واپس آئے گا جیسے اس دن پیدا ہوا تھا۔اخر میں انہوں نے دعا کی کہ اللہ تعالیٰ سیکیورٹی فورسز کی کوششوں کو قبول فرمائے، ان کے اخلاص کا بہترین اجر عطا کرے اور مملکتِ سعودی عرب کو مزید امن، سلامتی اور استحکام عطا فرمائے۔