یمن: حوثیوں سے سفارتکاروں اور یو این اہلکاروں کی فوری رہائی کا مطالبہ

یو این منگل 3 جون 2025 03:30

اسلام آباد (اُردو پوائنٹ ۔ UN اردو۔ 03 جون 2025ء) اقوام متحدہ کے سیکرٹری جنرل انتونیو گوتیرش نے یمن میں حوثیوں (انصاراللہ) کے زیر حراست اقوام متحدہ، این جی اوز، سول سوسائٹی کے اداروں اور سفارت خانوں کے اہلکاروں کی فوری اور غیرمشروط رہائی کے مطالبے کو دہرایا ہے۔

رواں ماہ ان میں درجنوں افراد کی ناجائز حراست کو ایک سال مکمل ہو جائے گا۔ سیکرٹری جنرل نے کہا ہے کہ اقوام متحدہ کے پروگرام برائے خوراک (ڈبلیو ایف پی) کے ایک اہلکار کی دوران قید موت واقع ہو چکی ہے۔

حوثیوں نے تاحال اس افسوسناک سانحے کی کوئی وضاحت پیش نہیں کی۔

انہوں نے مطالبہ کیا ہے کہ اس واقعے کی فوری، شفاف اور مفصل تحقیقات کی جائیں اور اہلکار کی موت کے ذمہ داروں کا محاسبہ یقینی بنایا جائے۔

(جاری ہے)

قیام امن کی کوششوں کا نقصان

سیکرٹری جنرل نے واضح کیا ہے کہ لوگوں کی بھلائی کے لیے اپنی ذمہ داریاں انجام دینے والے امدادی شراکت داروں کو گرفتار یا قید کرنے کی ممانعت ہے۔ یمن میں ان گرفتاریوں سے اقوام متحدہ کے کام کی صلاحیت متاثر ہوئی ہے اور امن کی راہ نکالنے کے لیے ثالثی کی کوششوں کو نقصان پہنچا ہے۔

ان کا کہنا ہے کہ جمعے کو عید الاضحیٰ دوسروں سے اظہار ہمدردی کا موقع ہے اور اس کی مناسبت سے حوثیوں کو ناجائز طور پر قید تمام لوگوں کو فوری رہا کرنا چاہیے تاکہ ان کے خاندانوں کی ابتلا کا خاتمہ ہو سکے۔

بصورت دیگر متواتر دوسرے سال ان کی عید اپنے عزیزوں کے بغیر گزرے گی۔

بھلایا نہیں گیا

انہوں نے 2021 اور 2023 سے حراست میں لیے گئے اہلکاروں اور رواں ماہ جنوری میں گرفتار کیے جانے والوں سمیت سبھی کی رہائی پر زور دیتے ہوئے کہا ہے کہ ان لوگوں کو بھلایا نہیں گیا اور اقوام متحدہ ان کی محفوظ اور فوری رہائی یقینی بنانے کے لیے ہرممکن ذرائع سے کام لیتا رہے گا۔

انہوں نے اس معاملے میں بین الاقوامی شراکت داروں، این جی اوز اور ان تمام لوگوں کی حمایت کا شکریہ ادا کرتے ہوئے رکن ممالک سے کہا ہے کہ وہ گرفتار اہلکاروں سے یکجہتی کا اظہار کریں اور ان کی رہائی کے لیے کوششوں میں تیزی لائیں۔