مکہ میں موبائل سٹروک یونٹ نے یوگنڈا کے عازمِ حج کی جان بچا لی

منگل 3 جون 2025 12:13

ریاض (اُردو پوائنٹ اخبارتازہ ترین - اے پی پی۔ 03 جون2025ء) مکہ مکرمہ مسجد الحرام میں میڈیکل ٹیم نے یوگنڈا کے عازم حج کو 16 انتہائی نازک منٹوں میں طبی امداد فراہم کر کے اس کی جان بچا لی۔ اردو نیوز کے مطابق مکہ ہیلتھ کلسٹرکی رپورٹ میں بتایا گیا کہ مریض جس کی دماغ کی شریان پھٹنے سےخون تیزی سے بہہ رہا تھا کو حیران کن طور پر صرف 16 انتہائی نازک منٹوں میں طبی امداد فراہم کی گئی۔

اس طرح کے علاج کے لیے بین الاقوامی معیار میں 60 منٹ کا وقت مقرر ہے۔ہنگامی طبی امداد کے بعد مریض کو کنگ عبدالعزیز ہسپتال منتقل کر دیا گیا جہاں ان کا تفصیلی معائنہ اور علاج کیا گیا،توقع ہے کہ حج کے ارکان کی ادائیگی کے لیے انہیں ہسپتال سے ڈسچارج کر دیا جائے گا۔سعودی عرب میں حج کی تیاریوں کے سلسلے میں، کنگ فیصل سپیشلسٹ ہسپتال اور ریسرچ سینٹر سے ملحق، جدید ترین تشخیصی طبی آلات سے لیس ایک موبائل سٹروک یونٹ مسجد الحرام میں میں قائم کیا گیا ہے۔

(جاری ہے)

اس ٹیم میں اعصاب، دل اور سانس کے امراض کے ڈاکٹروں کے علاوہ تھراپسٹ ایمرجنسی رسپانس، نرسنگ کے شعبے سے متعلق افراد، ریڈیالوجسٹ اور فوری طبی امداد فراہم کرنے والے ماہرین شامل ہیں۔ہر سال، دسیوں ہزار حجاج کرام ہیلتھ سینٹر اور ہسپتالوں کی طرف سے مقاماتِ مقدسہ پر ملنے والی طبی امداد اور خدمات سے استفادہ کرتے ہیں۔سعودی عرب عوام کے علاج معالجے کے لیے 50 ہزار سے زیادہ طبی عملے اور دیگر پیشہ ورانہ ماہرین کو حج کے موقع پر 24 گھنٹے خدمات کی فراہمی کے لیے متعین کرتا ہے۔گزشتہ ہفتے مکہ میں کنگ عبداللہ سٹی کے آنکھوں کے سینٹر کی ایک ٹیم نے مصر سے حج کے لیے سعودی عرب آئے ہوئے ایک زائر کی آنکھ بچائی تھی جنھیں اچانک نظر آنا بند ہوگیا تھا۔