خلیل الرحمن قمر ہنی ٹریپ مقدمہ سے بری ملزم پر منشیات کا مقدمہ ، 2ایس پیز کی ہائیکورٹ کو مطمئن نہ کرسکے

لاہور (اُردو پوائنٹ اخبارتازہ ترین - این این آئی۔ 03 جون2025ء) خلیل الرحمان قمر ہنی ٹریپ مقدمہ سے بری ہونے والے ملزم حسن رضا پر منشیات کے مقدمہ میں دو ایس پیز لاہور ہائیکورٹ کو مطمئن نہ کرسکے ،عدالت نے نا مکمل ریکارڈ پیش کرنے پر ایس پیز پر اظہار ناراضگی کرتے ہوئے ریمارکس دئیے کہ پولیس والے سمجھتے ہیں کہ وہ عدالت کی انکھوں میں دو جھونک دیں گے ایسا نہیں ہوسکتا ،ایس پی سی سی ڈی لاہور آفتاب پھلروان کو مکمل ریکارڈ سمیت طلب کرلیا گیا ۔

جسٹس فاروق حیدر نے منشیات کے ملزم حسن رضا کی درخواست ضمانت پر سماعت کی ،ایس پی انویسٹی گیشن اقبال ٹائون سدرہ خان اور ایس پی انویسٹی گیشن صدر ڈویژن معظم ، ڈپٹی پراسیکیوٹرجنرل رانا محمد عمران انجم کے ہمراہ پیش ہوئے ، جسٹس فاروق حیدر نے استفسار کیا کہ کس تھانہ میں مقدمہ درج ہوا اور کب ۔

(جاری ہے)

وکیل صفائی نے جواب دیا کہ 23جولائی 2024ء کو تھانہ سندر نے مقدمہ درج کرکے جیل بھجوایا ۔

ایس پی انویسٹی گیشن سدرہ خان نے عدالت کو بتایا کہ دو مقدمات ہیں ، ملزم کے خلاف اغواء کے متعلق مقدمہ تھانہ سندر اور منشیات کا تھانہ سبزہ زار میں درج ہوا ،جو بی بی گرفتار ہوئی اس نے چودہ ملزمان کا انکشاف کیا ، 10کو شناخت پریڈ پر بھیجا گیا ، اس خاتون نے حسن رضا سمیت دیگر کو نامزد کیا ، ضمنی میں بھی لکھا ہے۔فاضل جج نے استفسار کیا کہ یہ موجودہ منشیات کی ایف آئی آر کس تاریخ کی ہے اور کس کے انکشاف پر درج ہوئی ،ایس پی انویسٹی گیشن سدرہ خان نے جواب دیا کہ 28جولائی دوہزار چوبیس کی ہے، آمنہ عروج کے انکشاف پر ملزم کو نامزد کیا گیا ۔

جسٹس فاروق حیدر نے استفسار کیا کہ کہاں لکھا ہوا ہے کہ ملزم حسن رضا جیل میں بند ہے،تفتیشی افسر متعلقہ دستاویزات عدالت میں پیش نہ کرسکا ، فاضل عدالت نے تفتیشی افسر پر اظہار ناراضی کرتے ہوئے کہا کہ آپ کو سمجھ آتی نہیں یا سمجھنا نیں چاہتے ، ایس پی صاحبہ کیا آپ کو عدالت کے سوالات کو سمجھ رہی ہیں یا آپ کو سمجھ نہیں آرہی ۔ ایس پی سدرہ خان نے جواب دیا کہ مجھے عدالت کے سوالات کی سمجھ آرہی ہے۔

جسٹس فاروق حیدر نے ریمارکس دئیے کہ ریکارڈ مکمل کیوں پیش نہیں کیا گیا ،آپ کیا سمجھتے ہیں کہ عدالت کی آنکھوں میں دھول جھونک دیں گے ایسا نہیں ہو سکتا، پولیس کا کام لوگوں کے لئے آسانیاں پیدا کرنا ہے مسائل نہیں ۔عدالت کے استفسار پر ایس پی سدرہ خان نے بتایا کہ اب منشیات کے مقدمہ کی تفتیش کرائم کنٹرول ڈیپارٹمنٹ کے پاس ہے،،عدالت نے ایس پی ، سی سی ڈی لاہور آفتاب پھروان کو مکمل ریکارڈ سمیت طلب کرتے ہوئے کیس کی مزید سماعت 11جون تک ملتوی کردی۔