سوشل میڈیا انفلیونسر ثناء یوسف کا سفاک قاتل گرفتار، مقتولہ کا موبائل فون ، آلہ قتل برآمد

منگل 3 جون 2025 21:40

اسلام آباد(اُردو پوائنٹ اخبارتازہ ترین - این این آئی۔ 03 جون2025ء)سوشل میڈیا انفلیونسر ثناء یوسف کا سفاک قاتل گرفتارکرکے مقتولہ کا موبائل فون اور آلہ قتل برآمدکرلیاگیا۔

(جاری ہے)

تفصیلات کے مطابق انسپکٹر جنرل آف پولیس اسلام آباد سید علی ناصر رضوی نے ریسکیو15-پر اہم پریس کانفرنس کی،اس موقع پر ڈی آئی جی اسلام آباد محمد جواد طارق،ایس ایس پی انوسٹی گیشنز ،ایس ایس پی آپریشنزاور ڈی ایس پی سی آئی اے موجود تھے، آئی جی اسلام آباد نے کہا کہ گزشتہ روز وفاقی دارلحکومت اسلام آباد میں قتل کا ایک اندہوناک واقعہ پیش آیا جس میں ایک 17سالہ سوشل میڈیا انفلیونسر ثناء یوسف کو ان کے گھر میں قتل کر دیا گیا، وقوعہ کا نوٹس لینے کے بعد ڈی آئی جی اسلام آباد کی زیر نگرانی سات مختلف پولیس ٹیمیں تشکیل دیں گئی ،جنہوں نے تکنیکی بنیادوں پر تفتیش عمل میں لاتے ہوئے سوشل میڈیااکائونٹس اور300سے زائد کالز ریکارڈ کو اینالائز ڈ کیا ،سیف سٹی اور پرائیوٹ کیمروں کی ویڈیوز حاصل کی گئیںاور قتل میں ملوث ملزم عمر حیات کو 20گھنٹوں کے اند ر فیصل آباد سے گرفتار کر لیا، گرفتار ملزم کے قبضہ سے مقتولہ کا موبائل فون اور آلہ قتل برآمد کر لیا گیا، سفاک ملزم قتل کرنے کے بعد شواہد کو مٹانے کی غرص سے مقتولہ کا موبائل فون ساتھ لے گیا تھا، ملزم کے گرفتاری کے لئے تین شہروں میں11 سے زائد مقامات پر ریڈ کئے گئے ،ملزم ایک 22سال کا بیروزگار نوجوان ہے جو مقتولہ کے ساتھ بار بار رابطے کے لئے کوشش کر رہا تھا،مقتولہ کی جانب سے رابطہ کے انکار پر ملزم نے اس کا قتل کیا تھا،آئی جی اسلام آباد نے کہا کہ ثناء یوسف کے کیس کے بعد اسلام آباد سمیت پورے ملک میں تشویش کی لہر دوڑ گئی تھی،کسی بیٹی کا یوں قتل ہو جانا ہمارے لئے بہت بڑا چیلنج تھا،ملزم کے گرفتار ی کے لئے ہم پر دبائو تھا اور ملزم کی شناخت بھی مشکل عمل تھا،اسلام آباد پولیس نے سابقہ کیسز کو حل کرتے ہوئے جس طرح ملزمان کی گرفتاریوں کو یقینی بنایا تھا ،اس کیس کو بھی قلیل مدت میں حل کرتے ہوئے ملزم کی گرفتاری کویقینی بنایا،انہوں نے مزید کہا کہ ملزم کے خلاف مضبوط مقدمہ قائم کرکے ،بہترین تفتیش اور شواہد کے حصول کو یقینی بناتے ہوئے مجاز عدالت سے قرار واقعی سز ا دلوائی جائے گی۔