عازمین حج چھتری کا استعمال کریں اس سے درجہ حرارت 10 ڈگری تک کم ہوجاتا ہے،سعودی حکام

جمعرات 5 جون 2025 09:30

ریاض (اُردو پوائنٹ اخبارتازہ ترین - اے پی پی۔ 05 جون2025ء) سعودی حکام نے کہا ہے کہ عازمین حج چھتری کا استعمال کریں اس سے درجہ حرارت 10 ڈگری تک کم ہوجاتا ہے۔اردو نیوز نے سعودی وزارت صحت کے ایک پر جاری بیان کے حوالے سے بتایا کہ چھتری کے استعمال سے درجہ حرارت دس ڈگری سینٹی گریڈ تک کم ہو جاتا ہے ۔

(جاری ہے)

وزارت نے عازمین حج کی سیفٹی اور مناسک کی محفوظ ادائیگی یقینی بنانے کے لیے آگاہی اور فیلڈ سروسز کی فراہمی کا اعلان کیا،اس کا مقصد مقدس مقامات کے سفر کے دوران صحت کی ہنگامی صورتحال سے نمٹنا ہے۔

حکام نے عازمین حج کو ہدایت کی کہ براہ راست سورج کی گرمی سے بچیں، کوشش کریں کہ زیادہ دیر باہر نہ ٹھہریں اور چھتری کا استعمال لازمی کریں۔ ان کا کہنا تھا کہ مشاعر مقدسہ میں ہیٹ سٹروک سے بچنے کے لیے پانی کا استعمال زیادہ سے زیادہ کر یں ۔ موسمیات کے قومی مرکز کے مطابق 7 ذی الحجہ سے 13 ذی الحجہ تک مشاعرمقدسہ میں درجہ حرارت 44 سے 47 ڈگری سینٹی گریڈ جبکہ ہوا میں نمی کا تناسب 20 سے 60 فیصد تک رہنے کا امکان ہے۔