حج 1446 کے دوران عازمین حج کی مؤثر نگرانی اور ٹریفک مینجمنٹ کے لیے جیو اے آئی ٹیکنالوجی کا استعمال

جمعرات 5 جون 2025 21:10

میدان عرفات (اُردو پوائنٹ اخبارتازہ ترین - اے پی پی۔ 05 جون2025ء) مکہ مکرمہ اور مقدس مقامات کے شاہی کمیشن نے کنگ عبدالعزیز سٹی برائے سائنس و ٹیکنالوجی کے اشتراک سے رواں حج سیزن کے دوران جدید جغرافیائی مصنوعی ذہانت (GeoAI) جیو اے آئی ٹیکنالوجی کا نفاذ کیا ہے، جس کا مقصد حجاج کرام کی نقل و حرکت، ٹریفک کی روانی اور بھیڑ کے بہاؤ کی مؤثر نگرانی کو یقینی بنانا ہے۔

حکام کے مطابق، اس جدید نظام کے تحت سیٹلائٹ سے حاصل شدہ اعلیٰ ریزولوشن تصاویر، حقیقی وقت میں ڈیٹا اور جغرافیائی تجزیے کے ذریعے مکہ مکرمہ میں داخلے کے مقامات، مسجد الحرام کے اطراف کے علاقے اور مقدس مقامات کی طرف جانے والے راستوں پر بھیڑ اور ٹریفک کی صورتحال کو مسلسل مانیٹر کیا جا رہا ہے۔ٹیکنالوجی کے ذریعے نہ صرف ہجوم کی کثافت کی پیشگی نشاندہی کی جا رہی ہے بلکہ متوقع رکاوٹوں اور رش کے اوقات کی بنیاد پر فوری فیصلے لے کر حجاج کو بہتر سہولیات فراہم کی جا رہی ہیں۔

(جاری ہے)

کمیشن کا کہنا ہے کہ GeoAI سسٹم کی مدد سے فیلڈ آپریشنز میں شامل اداروں کے درمیان ہم آہنگی کو مزید بہتر بنایا جا رہا ہے، جبکہ حجاج کرام کے لیے نقل و حرکت کو محفوظ اور آسان بنانے کے لیے بروقت اقدامات کیے جا رہے ہیں۔یہ اقدام حج کے دوران انتظامی امور کو جدید خطوط پر استوار کرنے کی ایک اہم کاوش ہے، جس سے نہ صرف سلامتی کے معیار میں اضافہ ہوا ہے بلکہ خدمات کی مجموعی کارکردگی میں بھی بہتری آئی ہے