ضلعی انتظامیہ مری کے زیر اہتمام ورلڈ انوائرمنٹ ڈے کی مناسبت سے مختلف پروگرامز کا انعقاد

جمعرات 5 جون 2025 22:50

راولپنڈی (اُردو پوائنٹ اخبارتازہ ترین - اے پی پی۔ 05 جون2025ء) ضلعی انتظامیہ مری کے زیر اہتمام ورلڈ انوائرمنٹ ڈے کی مناسبت سے مختلف پروگرامز منعقد کیے گئے۔ تفصیلات کے مطابق ملک بھر کی طرح ملکہ کوہسار مری میں بھی ورلڈ انوائرمنٹ ڈے کی مناسبت سے آگاہی مہم کا انعقاد کیا گیا۔ ضلعی انتظامیہ مری کے زیر اہتمام جی پی او چوک میں ورلڈ انوائرمنٹ ڈے کو زیرو پلاسٹک ڈے کے طور پر منانے کے لیے آگاہی واک کا انعقاد کیا گیا۔

ریلی کے شرکاء نے ماحول دوست کو پروان چڑھانے کے لیے زیرو پلاسٹک پالیسی کو اہمیت دینے پر زور دیا۔ محکمہ جنگلات مری کی جانب سے بھی لوئر ٹوپہ، گھوڑا گلی سمیت ضلع کے دوسرے علاقوں میں شجر کاری مہم کا انعقاد کیا گیا۔ شجر کاری مہم کے انعقاد کا مقصد صاف ستھرے ماحول کو پروان چڑھانا ہے۔

(جاری ہے)

پٹریاٹہ کے مقام پر چئیر لفٹ انتظامیہ کی جانب سے بھی ورلڈ انوائرمنٹ ڈے کی مناسبت سے زیرو پلاسٹک ڈے منایا گیا۔

ضلعی انتظامیہ کی جانب سے مختلف مقامات پر بینرز آویزاں کیے گئے جن پر انسان دوست ماحول کو پروان چڑھانے کے لیے پلاسٹک کے استعمال پر پابندی کے ساتھ اس کے نقصانات کے حوالے سے آگاہی فراہم کی گئی۔ اسسٹنٹ کمشنر آفس کوٹلی ستیاں میں پودے لگائے گئے۔ ان تمام اقدامات کا مقصد عوام کو پلاسٹک ترک کرنے کی ترغیب دینا اور پنجاب حکومت کی ماحول دوست پالیسی کو اُجاگر کرناہے۔