بی جے پی حکومت کا حریت پسند کشمیریوں کو نشانہ بنانے کا سلسلہ جاری،رواں سال 99جائیدادیں ضبط

یہ جائیدادیں غیر قانونی سرگرمیوں کی روک تھام کے کالے قانون (یو اے پی ای)کی مختلف دفعات کے تحت ضبط کی گئی ہیں

پیر 9 جون 2025 11:40

سرینگر(اُردو پوائنٹ اخبارتازہ ترین - این این آئی۔ 09 جون2025ء) غیر قانونی طورپربھارت کے زیر قبضہ جموں وکشمیر میں بی جے پی کی زیر قیادت بھارتی حکومت نے اقوام متحدہ کی قراردادوں کے مطابق حق خودارادیت کا جائز مطالبہ کرنے پر مظلوم کشمیریوں کو ان کے گھروں اور زرعی اراضی سمیت جائیدادوں سے محروم کر نے کا سلسلہ جاری رکھا ہوا ہے۔کشمیرمیڈیاسروس کے مطابق ا نتہائی کرپٹ لیفٹننٹ گورنرمنوج سنہا کی زیر قیادت قابض انتظامیہ نے رواں سال جنوری سے جون تک مختلف آزادی پسند تنظیموں سے وابستہ کشمیریوں کی زمینوں اور مکانات سمیت کروڑوں روپے مالیت کی 99جائیدادیں ضبط کرلی ہیں۔

یہ جائیدادیں غیر قانونی سرگرمیوں کی روک تھام کے کالے قانون (یو اے پی ای)کی مختلف دفعات کے تحت ضبط کی گئی ہیں۔

(جاری ہے)

بی جے پی کی زیرقیادت بھارتی حکومت کی ایماء پر بدنام زمانہ تحقیقاتی اداروں این آئی اے اور ایس آئی یونے ملکر پہلے ہی سرینگر میں کل جماعتی حریت کانفرنس کے ہیڈ کوارٹر کوسیل کررکھا ہے اورپورے مقبوضہ جموں وکشمیرمیں حریت رہنمائوں اور تنظیموں سے تعلق رکھنے والے سینکڑوں مکانات اوردیگر جائیدادیں ضبط کر لی ہیں۔

قابض حکام نے مقبوضہ علاقے میں متعدد رہائشی مکانات، دکانوں، شاپنگ کمپلیکسز اور دیگر جائیدادوں کو مسماربھی کر دیا ہے۔ ان کارروائیوں کا مقصد مقبوضہ جموں وکشمیرکے متنازعہ علاقے میں امن، آزادی اور انصاف کے لیے کردار اداکرنے پر حریت پسندوں اورتنظیموں کی سزا دینا ہے۔