ای-اینڈ یو اے ای کا فائیو جی ایڈوانسڈ ٹیکنالوجی میں 600 ایم بی پی ایس اپ لنک رفتار حاصل کر نے کا عالمی ریکارڈ

منگل 10 جون 2025 13:43

ابوظہبی (اُردو پوائنٹ اخبارتازہ ترین - اے پی پی۔ 10 جون2025ء) متحدہ عرب امارات کے ممتاز ٹیلی کمیونیکیشن ادارے ای۔اینڈ یو اے ای نے لائیوفائیو جی نیٹ ورک پر 600 میگا بٹ فی سیکنڈ (Mbps) کی اپ لنک رفتار حاصل کر کے کنیکٹیوٹی کے میدان میں نیا عالمی ریکارڈ قائم کر دیا ہے، جو فائیو جی ایڈوانسڈ کی ترقی میں ایک اہم سنگِ میل ہے۔متحدہ عرب امارات کی نیوز ایجنسی وام کی رپورٹ کے مطابق یہ نمایاں کامیابی FR1 بینڈز (2100 میگاہرٹز اور سی-بینڈ) کی ایگریگیشن اور اپ لنک 3Tx (تین اینٹینا کی ترسیل) کی بدولت حاصل ہوئی، جو ایک تجارتی کسٹمر پریمیسز ایکوئپمنٹ (CPE) پر ایک لائیو 5G سائٹ پر انجام دی گئی۔

یہ سارا عمل 3GPP ریلیز 17 کے معیارات کے مکمل مطابق تھا۔یہ ریکارڈ قائم کرنے والی اپ لنک رفتار 5G-ایڈوانسڈ ٹیکنالوجی کا بنیادی ستون ہے، جو اپ لنک پر مبنی ایپلی کیشنز کو بے مثال کارکردگی فراہم کرتی ہے۔

(جاری ہے)

FR1 بینڈ ایگریگیشن اور جدید اپ لنک ٹیکنالوجی میں مہارت حاصل کر کے e& یو اے ای نے 5G کے معیار میں عالمی قیادت کا مقام حاصل کر لیا ہے۔e& یو اے ای کے نائب صدر برائے فکسڈ ایکسیس نیٹ ورک، عبدالرحمن الحمیضان نے اس موقع پر کہا کہ600 Mbps کی اپ لنک رفتار حاصل کرنا محض ایک ٹیکنیکل کامیابی نہیں بلکہ ڈیجیٹل دنیا کی تشکیل نو کے لئے ایک مضبوط سنگِ بنیاد ہے۔

یہ متحدہ عرب امارات کو عالمی ٹیکنالوجی کے صفِ اوّل میں شامل کرنے کی جانب ایک اہم قدم ہے۔ یہ رفتار ایسی ایپلی کیشنز کے لئے نئی راہیں ہموار کرے گی جن میں اپ لنک کا کردار مرکزی ہو، مثلاً اسمارٹ فیکٹریز اور لاجسٹکس مراکز جو بڑے پیمانے پر سینسر ڈیٹا کو حقیقی وقت میں اپ لوڈ کر کے مصنوعی ذہانت پر مبنی آٹومیشن اور تجزیے کو ممکن بناتے ہیں۔

اسی طرح کلاؤڈ پر مبنی تعاون میں بھی جدت آئے گی، جہاں تھری ڈی ماڈلنگ، آگمینٹڈ ریئلٹی (AR) اور ورچوئل ریئلٹی (VR) جیسے شعبے فوری اپ لوڈنگ کے ذریعے ترقی پائیں گے۔ سمارٹ شہروں میں لائیو ویڈیو اینالٹکس اور ڈرون سرویلنس جیسی ایپلی کیشنز بروقت اپ لوڈنگ کے باعث مؤثر فیصلوں میں معاون ہوں گی۔صارفین کے لئےبھی یہ پیش رفت انقلابی ثابت ہو گی، کیونکہ 8K وڈیوز اور لائیو اسٹریمنگ جیسے مواد کو یوٹیوب یا ٹک ٹاک جیسے پلیٹ فارمز پر چند سیکنڈز میں اپ لوڈ کیا جا سکے گا۔ گیمنگ میں وقفے کے بغیر کلاؤڈ کنیکٹیویٹی حاصل ہو گی، جبکہ سمارٹ ہومز ہائی ڈیفینیشن ویڈیوز اور آئی او ٹی ڈیٹا کو فوری اپ لوڈ کر سکیں گے۔