اٹلی کے سائیکل سوارجوناتھن میلان نے کرائیٹیرم ڈو ڈافین سائیکل ریس کا دوسرا مرحلہ جیت لیا

منگل 10 جون 2025 13:10

پیرس (اُردو پوائنٹ اخبارتازہ ترین - اے پی پی۔ 10 جون2025ء) اٹلی کے سائیکلسٹ جوناتھن میلان نے کرائیٹیرم ڈو ڈافین سائیکل ریس کا دوسرا مرحلہ جیت لیا۔ 24 سالہ جوناتھن میلان کی یہ کرائیٹیرم ڈو ڈافین ریس میں پہلی سٹیج فتح ہے۔ کرائیٹیرم ڈو ڈافین کا 77 واں ایڈیشن شروع ہوچکا ہے جس میں سائیکلنگ کی دنیا کے نامور سائیکل سوار ٹائٹل کے حصول کے لئے کوشاں ہیں۔

کرائیٹیرم ڈو ڈافین سائیکل ریس کے دوسرے مرحلے میں سائیکل سواروں نے پریمیلہٹ ٹو اسوائر تک کا فاصلہ طے کرنا تھا جو پہاڑی راستے پر 204.6 کلو میٹر پر محیط تھا۔ 24 سالہ جوناتھن میلان نے عمدہ سائیکلنگ کا مظاہرہ کرتے ہوئے 204.6کلومیٹر کا فاصلہ 4گھنٹے 54 منٹ اور 49 سیکنڈز میں طے کرکے دوسرے مرحلے میں پہلی پوزیشن حاصل کی۔

(جاری ہے)

25 سالہ انگلینڈ کے سائیکل سوار فریڈ رائٹ نے دوسری جبکہ نیدرلینڈ کے 30 سالہ سائیکل سوار میتھیو وین ڈیر پوئل نے تیسری پوزیشن حاصل کی۔

ریس میں اٹلی کے سائیکلسٹ جوناتھن میلان نے دوسرا مرحلہ جیتنے کے ساتھ یلو جرسی پر قبضہ حاصل کرلیا ہے۔ انہوں نے یلو جرسی سلووینیا کے سائیکلسٹ تڈیج پوگاکر سے حاصل کی ہے۔ کرائیٹیرم ڈو ڈافین ایک سٹیج سائیکلنگ ریس ہے جو 8 مراحل پر مشتمل ہے جس میں سائیکل سوار 1199.6 کلو میٹر کا سفر طے کرینگے۔ کرائیٹیرم ڈو ڈافین سائیکل ریس 15 جون کو اختتام پذیر ہوگی۔\932