بلوچستان کے مختلف اضلاع میں 15 ہزار سولر پینلز تقسیم کیے جا رہے ہیں،میر اصغر رند

منگل 10 جون 2025 22:30

کوئٹہ (اُردو پوائنٹ اخبارتازہ ترین - اے پی پی۔ 10 جون2025ء) پارلیمانی سیکرٹری برائے توانائی بلوچستان میر اصغر رند نے سی پیک منصوبے کے تحت چینی حکومت کی جانب سے فراہم کردہ سولر پینلز کی تقسیم کی تقریب میں شرکت کی ۔ تقریب میں مختلف سرکاری افسران، سیاسی و سماجی شخصیات نے شرکت کی اس موقع پر کسانوں، ہنرمندوں، فنکاروں، صحافیوں اور عام شہریوں کو سولر پینلز تقسیم کیے گئے، جن کا مقصد بلوچستان میں بجلی کی کمی پر قابو پانا اور پسماندہ علاقوں کو توانائی کی سہولت فراہم کرنا ہے۔

تقریب سے خطاب کرتے ہوئے میر اصغر رند نے کہا کہ وزیر اعلیٰ بلوچستان میر سرفراز بگٹی کے وژن کے تحت صوبے بھر میں توانائی بحران پر قابو پانے کے لیے سی پیک کے تعاون سے سولر پینلز کی تقسیم کا عمل شروع کیا گیا ہے۔

(جاری ہے)

انہوں نے بتایا کہ پہلے مرحلے میں بلوچستان کے مختلف اضلاع میں 15 ہزار سولر پینلز تقسیم کیے جا رہے ہیں، جبکہ اگلے مرحلے میں مزید 30 ہزار پینلز فراہم کیے جائیں گے۔

میر اصغر رند نے واضح کیا کہ پینلز کی تقسیم آبادی کے تناسب اور ضرورت کے مطابق کی جا رہی ہے اور ضلع کیچ کے مختلف تحصیلوں میں تقریباً ایک ہزار سولر پینلز فراہم کیے جا رہے ہیں۔ انہوں نے اس بات پر زور دیا کہ یہ عمل مکمل طور پر شفاف، غیر جانبدار اور سیاسی وابستگی سے بالاتر ہو کر انجام دیا جا رہا ہےتاکہ بجلی سے محروم علاقوں کو ترجیح دی جا سکے ۔ انہوں نے کہا کہ حکومت بلوچستان بجلی کے منصوبوں، انفرااسٹرکچر کی بہتری اور نوجوانوں کو روزگار کی فراہمی جیسے اقدامات کے ذریعے صوبے کو ترقی کی راہ پر گامزن کر رہی ہے۔