اداکارہ ثانیہ سعید ثنا یوسف کے قتل پر آبدیدہ، معاشرتی بے حسی پر کڑی تنقید

میں ہر روز خواتین کے قتل کی خبریں سن کر جاگتی ہوں اور ثنا یوسف کا واقعہ محض ایک فرد کا نہیں بلکہ ایک خوفناک رجحان کا حصہ ہے

بدھ 11 جون 2025 11:24

اداکارہ ثانیہ سعید ثنا یوسف کے قتل پر آبدیدہ، معاشرتی بے حسی پر کڑی ..

لاہور (اُردو پوائنٹ اخبارتازہ ترین - این این آئی۔ 11 جون2025ء)اداکارہ ثانیہ سعید ٹک ٹاکر ثنا یوسف کے لرزہ خیز قتل پر گفتگو کے دوران آبدیدہ ہوگئیں۔پاکستانی شوبز انڈسٹری کی مایہ ناز فنکارہ ثانیہ سعید حالیہ دنوں ایک پوڈکاسٹ میں شریک ہوئیں، جہاں انہوں نے ٹک ٹاک اسٹار ثنا یوسف کے بہیمانہ قتل پر شدید رنج و غم کا اظہار کیا۔ گفتگو کے دوران جب ثنا کا نام لیا گیا تو اداکارہ اپنے جذبات پر قابو نہ رکھ سکیں اور آنکھوں سے آنسو چھلک پڑے۔

ثانیہ نے نم آنکھوں سے کہا کہ میں ہر روز خواتین کے قتل کی خبریں سن کر جاگتی ہوں اور ثنا یوسف کا واقعہ محض ایک فرد کا نہیں بلکہ ایک خوفناک رجحان کا حصہ ہے، کتنی ہی خواتین اسی طرح قتل کردی جاتی ہیں۔انہوں نے افسوس کا اظہار کرتے ہوئے کہا کہ ہمارے معاشرے نے اس ظلم کو معمول بنالیا ہے۔

(جاری ہے)

اداکارہ کا کہنا تھا کہ ہم اکثر ظلم کو جواز دے کر نظرانداز کرنے کی کوشش کرتے ہیں، جو ایک نہایت خطرناک سوچ ہے، ثنا یوسف ایک سادہ اور بیضرر لڑکی تھی، جس کا کسی تنازع سے کوئی تعلق نہ تھا اور نہ ہی کوئی ایسا کام کر رہی تھی کہ جس سے کسی کو کوئی پریشانی ہو، اس کے باوجود اسے ہدف بنایا گیا۔

انہوں نے اس بات پر زور دیا کہ خواتین کے حقوق کیلیے مسلسل آواز بلند کرنا ناگزیر ہے۔ میرا جسم میری مرضی جیسے نعرے کسی بیراہ روی کیلیے نہیں بلکہ اس بنیادی حق کیلیے ہیں کہ ایک عورت کو اپنی زندگی کے فیصلوں پر اختیار حاصل ہو۔ثانیہ سعید نے یہ بھی کہا کہ ہمارے معاشرے میں مردوں کی جذباتی ناپختگی بھی اس مسئلے کی ایک بڑی وجہ ہے اور یہ تشدد صرف خواتین کے خلاف نہیں بلکہ خود مردوں کی بیبسی کی بھی علامت ہے۔