گرمی کی شدت میں اضافہ سے مرچ کی فصل پر خطرناک بیماریاں حملہ آور ہوسکتی ہیں،محكمہ زراعت

بدھ 11 جون 2025 22:36

سمبڑیال (اُردو پوائنٹ اخبارتازہ ترین - اے پی پی۔ 11 جون2025ء) اسسٹنٹ ڈائریکٹر محکمہ زراعت توسیع سمبڑیال ڈاکٹر افتخار حسین بھٹی نے کہا ہے کہ گرمی کی شدت میں اضافہ سے مرچ کی فصل پر خطرناک بیماریاں حملہ آور ہوسکتی ہیں،ان دنوں درجہ حرارت 46 سے اوپر جارہا ہے ،گرمی کی شدت سے مرچ کی فصل پر سفید مکھی، تھرپس اورسبز تیلہ سمیت رس چوسنے والے کیڑے کے حملہ کرسکتے ہیں، کاشتکاران بیماریوں کو روکنے کیلئے فوری تدارکی اقدامات یقینی بنائیں تاکہ مرچ کو پتوں کے مڑا کی بیماری کے حملے سے بچایا جا سکے۔

ان خیالات کا اظہار اسسٹنٹ ڈائریکٹر محکمہ زراعت توسیع سمبڑیال ڈاکٹر افتخار حسین بھٹی نے بدھ کو یہاں کاشتکاروں کے نام اپنے پیغام میں کیا۔انہوں نے کہا کہ مرچ پنجاب کی اہم سبزی ہے جس میں معدنی نمکیات،حیاتین کے علاوہ نشاستہ اور طاقت کی اکائیاں بھی پائی جاتی ہیں۔

(جاری ہے)

انہوں نے بتایاکہ مرچ کی فصل پر تنے کے گلائو، مرچ کے کوڑھ، پتوں کے مڑنا،مرچ کے مرجھائو اور مرچ کی نیم مردگی جیسی بیماریاں بھی حملہ آور ہوتی ہیں۔

انہوں نے مرچ کے کاشتکاروں کو سفارش کی کہ وہ ان بیماریوں کی علامات بارے آگاہی حاصل کریں۔ انہوں نے بتایا کہ مرچ کے تنے کے گلائو کی بیماری کے حملہ کی صورت میں پودے کا تنا زمین کی سطح کے قریب سے گل جاتا ہے جبکہ فائی ٹافتھورارٹ پھپھوند اس بیماری کے پھیلائو کا باعث بنتی ہے اور جب پودے پھول اور پھل پر ہوتے ہیں تو سارے کا سار ا پودا سوکھ جاتا ہے۔

انہوں نے بتایاکہ کاشتکار اس بیماری کے تدارک کیلئے پودوں کا معائنہ کرتے رہیں اور متاثرہ پودوں کو کھیت سے فوری طورپر نکال کر جلادیں یا زمین میں دبا دیں۔انہوں نے کہاکہ اس بیماری کے تدارک کیلئے کاشتکار سفید مکھی اور اس کے بچوں کی تعداد پر خصوصی نظر رکھیں اور ہفتہ میں دو بار پیسٹ سکاٹنگ کریں۔ انہوں نے کہا کہ محکمہ زراعت توسیع وپیسٹ وارننگ کے مقامی عملہ کی مشاورت سے زہروں کا اسپرے کریں۔