خیبر پختونخوا کے صوبائی وزیر پختون یار خان کا ضلع بنوں کا دورہ

بدھ 11 جون 2025 22:47

پشاور (اُردو پوائنٹ اخبارتازہ ترین - اے پی پی۔ 11 جون2025ء) خیبر پختونخوا کے صوبائی وزیر برائے پبلک ہیلتھ انجینئرنگ پختون یار خان نے ضلع بنوں کے دورے کے دوران سنٹرل جیل اور علاقے اسماعیل خانی میں ترقیاتی منصوبے کا افتتاح کیا۔ اس موقع پر انہوں نے قیدیوں کیلئے بنیادی سہولیات کی فراہمی اور عوامی خدمت کے عزم کا اظہار کیا ۔ پختون یار خان نے سنٹرل جیل بنوں کا تفصیلی معائنہ کیا جہاں سپرنٹنڈنٹ جیل سمیع اللہ شنواری نے انہیں جیل کے انتظامی معاملات، سیکیورٹی، قیدیوں کی تعداد اور دستیاب سہولیات سے متعلق تفصیلی بریفنگ دی ۔

صوبائی وزیر نے مختلف بیرکوں کا جائزہ لیا اور صفائی، طبی سہولیات اور سیکیورٹی انتظامات پر اطمینان کا اظہار کرتے ہوئے کہا کہ جیل میں قید افراد بھی ریاست کے شہری ہیں اور انہیں تمام بنیادی انسانی حقوق فراہم کئے جائیں گے ۔

(جاری ہے)

انہوں نے اعلان کیا کہ جیل میں فری میڈیکل کیمپ، مفت ادویات، صاف پانی اور دیگر بنیادی سہولیات کی فراہمی کے منصوبے جلد شروع کئے جائیں گے۔

اس موقع پر انہوں نے گرفتار پارٹی کارکنوں سے بھی ملاقات کی ان کے مسائل سنے اور انصاف کی فراہمی کی یقین دہانی کرائی۔ انہوں نے جیل سپرنٹنڈنٹ کو ہدایت کی کہ سہولیات کی کمی سے متعلق باقاعدہ تجویز تیار کر کے فوری اقدامات کیلئے ہیڈ کوارٹر بھیجی جائے۔ بعد ازاں صوبائی وزیر نے بنوں کے علاقے اسماعیل خانی میں تعمیر ہونے والے ترقیاتی منصوبے کا افتتاح کیا ۔

افتتاحی تقریب سے خطاب کرتے ہوئے انہوں نے کہا کہ حکومت عوامی مسائل کے حل اور علاقائی ترقی کو اولین ترجیح دے رہی ہے۔ انہوں نے کہا کہ ضلع بنوں میں ترقیاتی منصوبے مربوط حکمت عملی کے تحت جاری ہیں تاکہ عوام کی خوشحالی یقینی بنائی جا سکے۔ پختون یار خان نے یقین دلایا کہ کوئی بھی علاقہ ترقیاتی کاموں سے محروم نہیں رہے گا اور عوام کو سہولیات ان کی دہلیز تک پہنچائی جائیں گی۔ مقامی عمائدین اور عوام نے منصوبے کی تکمیل پر خوشی کا اظہار کرتے ہوئے صوبائی وزیر کا شکریہ ادا کیا ۔ صوبائی وزیر کے اس دورے کو عوامی و اصلاحاتی اقدامات کی جانب ایک مثبت پیش رفت قرار دیا جا رہا ہے۔