Live Updates

محکمہ سول ڈیفنس آزاد جموں وکشمیر میں بائیو میٹرک سسٹم تباہ حالی کا شکار

ڈی جی سمیت آفیسران و اہلکاران بدستور عید الاضحی کی چھٹیاں منانے میں مصروف

جمعرات 12 جون 2025 16:02

مظفرآباد(اُردو پوائنٹ اخبارتازہ ترین - این این آئی۔ 12 جون2025ء) محکمہ سول ڈیفنس آزاد جموں وکشمیر میں بائیو میٹرک سسٹم تباہ حالی کا شکار کرنے کے بعد ڈی جی سمیت آفیسران و اہلکاران بدستور عید الاضحی کی چھٹیاں منانے میں مصروف۔ بھارتی جارحیت کے دوران تنظیم شہری دفاع کی کارکردگی کو اپنے پلڑے میں ڈال کر خوب فوٹو سیشن کیا گیا مگر نہ تو وارڈن پوسٹوں پر کسی بھی قسم کا حفاظتی یا دیگر سامان مہیا کیا جا سکا اور نہ ہی شہری دفاع کے حوالے سے کوئی کام۔

چند روز پسند و ناپسند کی بنیاد پر اپنے اپنے علاقوں میں کچھ تعلیمی اداروں میں فوٹو سیشن کے بعد محکمہ شہری دفاع کے افیسران و اہلکاران لمبی تان کر سو گئے۔ سالانہ لاکھوں کا بجٹ کہاں جاتا ہے اس سوال کا جواب دینے کے بجائے محکمہ شہری دفاع نے ڈنگ ٹپاؤ پالیسیوں کو وطیرہ بنا لیا۔

(جاری ہے)

تفصیلات کے مطابق عید الاضحی کی تعطیلات ختم ہوئے کئی روز گزر گئے مگر محکمہ سول ڈیفنس کے آفسران و اہلکاران دفتر حاضر نہ ہو سکے۔

مرکزی شہری دفاع کے دفتر میں نصب بائیو میٹرک مشین ایک عرصہ ہوا خراب ہو گئی یا کر دی گئی یہ ایک الگ معمہ ہے مگر آفیسران و اہلکاران کی دفتر حاضر نہ ہونے کی پالیسیاں حکومتی رٹ پر چھبتا ہوا سوال بن چکی ہیں۔ عید الاضحی کی تفصیلات کے بعد آج تک نہ تو ڈی جی محکمہ شہری دفاع اور نہ ہی سینیئر آفسران سمیت پسند و ناپسند کی بنیاد پر کاسہ لیسی کرنے والے دفتر حاضر ہو سکے۔

سیاسی، سماجی، مذہبی، تجارتی، عوامی، علمی، ادبی حلقوں کے اکابرین سمیت سول سوسائٹی کے زعماء اور دیگر عوام الناس شہریوں کا کہنا ہے کہ محکمہ شہری دفاع سراسر حکومتی خزانے پر بوجھ ہے، جس کا قبلہ درست کرنا وقت کی اشد ضرورت ہے۔ ان کا کہنا ہے کہ محکمہ شہری دفاع کو فعال بنانے کے لیے سب سے پہلے تو حکومت محکمہ شہری دفاع کے مرکزی دفتر میں نصب بائیو میٹرک مشین کی خرابی کی وجوہات معلوم کرے اور پھر روزانہ کی بنیاد پر ان سے کارکردگی رپورٹ طلب کی جائے تو دودھ کا دودھ اور پانی کا پانی ہو جائے گا۔