میٹا اے آئی نے تخلیقی صلاحیتوں کے لیے جنریٹو ویڈیو ایڈیٹنگ متعارف کرا دی

اسلام آباد (اُردو پوائنٹ اخبارتازہ ترین - اے پی پی۔ 12 جون2025ء) میٹا اے آئی نے مصنوعی ذہانت پر مبنی ایک نیا جنریٹو اے آئی ویڈیو ایڈیٹنگ فیچر متعارف کرایا ہے جو اب میٹا اے آئی ایپ، Meta.AI ویب سائٹ اور ایڈٹس ایپ پر دستیاب ہے۔ اس فیچر کے ذریعے صارفین مختصر ویڈیوز کو پہلے سے تیار کردہ اے آئی پرامپٹس کی مدد سے بآسانی بہتر بنا سکتے ہیں جس سے محض ایک کلک سے ویڈیوز میں ملبوسات، مقامات اور لائٹنگ کو با آسانی تبدیل کیا جا سکتا ہے۔

میٹا کی طرف سے جاری بیان کے مطابق میٹا کے مووی جن ماڈلز سے متاثر اس ریلیز کو میٹا کے پلیٹ فارمز پر مصنوعی ذہانت (اے آئی) سے چلنے والی ویڈیو جنریشن کی توسیع کا پہلا قدم قرار دیا جا رہا ہے۔ رواں سال کے آخر تک صارفین اپنی مرضی کے ٹیکسٹ پرامپٹس کے ذریعے ویڈیوز میں ایڈیٹنگ کر سکیں گے جس سے تخلیقی امکانات مزید بڑھ جائیں گے۔

(جاری ہے)

اس فیچر کو آسان اور قابل رسائی بنایا گیا ہے تاکہ بغیر کسی پیشہ ورانہ مہارت کے بھی صارفین معیاری ویڈیو ایڈیٹس تیار کر سکیں۔

صارفین میٹا اے آئی ایپ، Meta.AI ویب یا ایڈٹس ایپ (Edits App) پر اپنی ویڈیوز اپ لوڈ کرکے 50 سے زائد پری سیٹ ایڈیٹنگ آپشنز میں سے انتخاب کرسکیں گے۔ محدود مدت کے لیے صارفین 10 سیکنڈ کی ویڈیوز کو مفت میں ایڈیٹ کر کے آزما سکتے ہیں۔چاہے کسی ویڈیو کو گرافک ناول طرز کی اینیمیشن میں بدلنا ہو، برستی بارش کے مناظر کو خواب کی طرز پر روشنی میں ڈھالنا ہو یا کسی سین کو ویڈیو گیم جیسے سینیمیٹک ایفیکٹس کے ساتھ دوبارہ تخلیق کرنا ہو، میٹا اے آئی کے ساتھ اب یہ سب ممکن بنانا بہت آسان ہوگا۔

ایڈیٹ کی گئی ویڈیوز کو براہ راست فیس بک اور انسٹاگرام پر میٹا اے آئی اور ایڈٹس ایپ کے ذریعے شیئر کیا جا سکتا ہے یا Meta.AI ویب سائٹ پر ڈسکور فیڈ میں پوسٹ کیا جا سکتا ہے۔یہ نئی سہولت میٹا کی اے آئی پر مبنی تخلیقی صلاحیتوں کے فروغ کے عزم کی عکاس ہے۔ اس فیچر کی تیاری میں کنٹینٹ کریئیٹرز کی آراء کو بھی شامل کیا گیا ہے تاکہ یہ تخلیقی عمل میں بہترین معاون ثابت ہو اور صارفین اپنے ناظرین سے مزید موثر انداز میں جڑ سکیں۔

میٹا اے آئی کے ویڈیو انوویشن کا سفر کئی سالوں کی تحقیق پر مبنی ہے۔ 2022ء میں ’میک اے سین‘ سے آغاز کرتے ہوئے، لاما امیج ماڈلز اور مووی جن جیسے منصوبے متعارف کرائے گئے۔ اب میٹا اے آئی کے اس پہلے ویڈیو ایڈیٹنگ فیچر کے ساتھ صارفین کے تخلیقی خواب حقیقت کا روپ دھارنے لگے ہیں۔