Live Updates

کہوٹہ پنڈی روڈ، سہالہ اوورہیڈ برج، بائی پاسز اور متاثرین کے معاوضے کا منصوبہ وفاقی بجٹ میں شامل، عوامی جدوجہد رنگ لے آئی

کہوٹہ سٹی بائی پاس، سہالہ بائی پاس اور متاثرین کو معاوضہ کی ادائیگی کا منصوبہ وفاقی بجٹ 2025-26 میں شامل کر لیا گیا

جمعہ 13 جون 2025 02:45

کہوٹہ(اُردو پوائنٹ اخبارتازہ ترین - این این آئی۔ 13 جون2025ء)عوامی ایکشن کمیٹی کہوٹہ کی طویل جدوجہد اور مسلسل احتجاج بالآخر رنگ لے آئی، کہوٹہ پنڈی روڈ، سہالہ اوورہیڈ برج چار لائن منصوبہ، کہوٹہ سٹی بائی پاس، سہالہ بائی پاس اور متاثرین کو معاوضہ کی ادائیگی کا منصوبہ وفاقی بجٹ 2025-26 میں شامل کر لیا گیا۔ اس خوش آئند پیشرفت کا اعلان امیدوار برائے صوبائی اسمبلی حلقہ پی پی-7 کرنل (ر) وسیم جنجوعہ نے عوامی ایکشن کمیٹی کہوٹہ کے رہنماں کے ہمراہ ایک نجی ہوٹل میں پرہجوم پریس کانفرنس سے خطاب کرتے ہوئے کیا۔

انہوں نے کہا کہ عوام کے مسلسل احتجاج، ریلیوں اور میڈیا کے دبا کے نتیجے میں حکومت نے آخرکار اس اہم میگا پراجیکٹ کو بجٹ میں شامل کر کے عوامی مطالبات تسلیم کیے ہیں۔

(جاری ہے)

انہوں نے مزید کہا کہ یہ منصوبہ صرف کہوٹہ ہی نہیں بلکہ آزاد کشمیر، اسلام آباد اور راولپنڈی کے لاکھوں شہریوں کے لیے سفری آسانی اور معاشی ترقی کا ضامن ہو گا۔ متاثرین بائی پاس کو معاوضے کی فراہمی کا ذکر کرتے ہوئے انہوں نے کہا کہ اب ان کے ساتھ ہونے والی ناانصافی کا ازالہ کیا جائے گا اور قانونی تقاضوں کے مطابق زمینوں کا معاوضہ دیا جائے گا۔

اس موقع پر عوامی ایکشن کمیٹی کے رہنما ملک عبدالرف، عنایت اللہ، راجہ عمران ضمیر، راجہ خورشید عالم اور دیگر نے بھی اظہار خیال کیا اور کہا کہ یہ کامیابی عوام کی اجتماعی جدوجہد کا ثمر ہے۔ انہوں نے حکومت سے مطالبہ کیا کہ منصوبے پر فوری عملی کام کا آغاز کیا جائے تاکہ مزید تاخیر نہ ہو۔