ڈی جی پی آر کے ایکریڈیشن کارڈ کیلئے 10سالہ تجربے کی شرط ختم

وزیر اطلا عات کی زیر صدارت صحافیوں کو درپیش مسائل کے حل کیلئے جائزہ کمیٹی کا اجلاس

جمعہ 13 جون 2025 18:27

لاہور(اُردو پوائنٹ اخبارتازہ ترین - این این آئی۔ 13 جون2025ء)وزیر اطلا عات پنجاب عظمی بخاری کی زیر صدارت صحافیوں کو درپیش مسائل کے حل کیلئے جائزہ کمیٹی کا اجلاس ہوا جس میںسیکرٹری اطلاعات پنجاب طاہر رضا ہمدانی اور ڈائریکٹر جنرل پبلک ریلیشنز پنجاب غلام صغیر شاہد ،لاہور پریس کلب کے صدر ارشد انصاری ،کاظم خان،نوید کاشف،حافظ طارق ،ایاز خان،نور اللہ اور محسن ممتاز سمیت دیگر نے شرکت کی ۔

اجلاس میں ڈی جی پی آر کے ایکریڈیشن کارڈ کیلئے 10سالہ تجربے کی شرط ختم کرتے ہوئے فیصلہ کیا گیا کہ اب ڈی جی پی آر کے ایکریڈیشن کارڈ صحافت میں مسلسل 5سالہ تجربہ کے حامل صحافیوں کو ملیں گے۔ اجلاس میں بتایا گیا کہ پنجاب میں اس سال 2725صحافیوں کو ایکریڈیشن کارڈ جاری کیے جاچکے ہیں ۔

(جاری ہے)

اجلاس میں فیصلہ کیا گیا کہ جائزہ کمیٹی صحافی کی متفقہ تعریف کا تعین کرے گی۔

اجلاس میں فیصلہ کیا گیا کہ اخبار مالکان اور ایڈیٹر ز کی تنظیمیں ڈمی اخبارات کے خاتمے کیلئے حکومت پنجاب سے تعاون کریں گی ۔ڈی جی پی آر کی جانب سے میڈیا کو بروقت ادائیگیوں پر جائزہ کمیٹی سے اظہار تشکر کیا گیا۔عظمی بخاری نے کہا کہ میڈیا ہائوسز اپنے ورکرز کو بروقت تنخواہیں ادا کریں۔ علاوہ ازیںوزیر اطلاعات پنجاب عظمی بخاری سے گوجرنوالہ پریس کلب کے نومنتخب عہدیداروں نے ملاقات کی عظمی بخاری نے گوجرنوالہ پریس کلب کے نومنتخب صدر رانا انصر اور دیگر عہدیداروں کو مبارکباد دیتے ہوئے کہا کہ گوجرنوالہ پریس کلب کو تمام صحافیوں کے لیے اوپن کیا جائے۔