22 نئے بس شیڈز کی تعمیر اور پارکس کی بحالی پرتیزی سے کام جاری ہے،کمشنر ملتان

جمعہ 13 جون 2025 22:00

ملتان (اُردو پوائنٹ اخبارتازہ ترین - اے پی پی۔ 13 جون2025ء) کمشنر ملتان عامر کریم خاں نے کہا ہے کہ شہریوں کے آرام و سہولت کے لیے22 نئے بس شیڈز کی تعمیر اور پارکس کی بحالی پرکام جاری ہے۔ اس ضمن میں اجلاس میں بس شیڈز کی تعمیر اور ایم ڈی اے کالونیوں میں پارکوں کی حالت کا تفصیلی جائزہ لیا گیا۔ اجلاس میں بتایا گیا کہ ملتان شہر میں 22 نئے بس شیڈز کی تعمیر پبلک پرائیویٹ پارٹنرشپ ماڈل کے تحت کی جا رہی ہے، جن میں سے 11 شیڈز ملتان ڈویلپمنٹ اتھارٹی جبکہ 11 معروف برانڈز کی جانب سے تعمیر کیے جا رہے ہیں۔

عامر کریم خاں نے کہا کہ بس شیڈز میں شہریوں کے آرام و سہولت کے لیے سایہ دار جگہ، بیٹھنے کے مناسب انتظامات، روشنی کا مکمل نظام اور دیگر جدید سہولیات فراہم کی جا رہی ہیں۔

(جاری ہے)

ان منصوبوں کا مقصد نہ صرف بہتر سفری سہولیات کی فراہمی ہے بلکہ یہ ماحول دوست ترقی کی جانب بھی ایک مثبت قدم ہے۔انہوں نے مزید کہا کہ بس سٹاپس کی تعمیر میں ملتانی ثقافت اور مقامی موسم کا خاص خیال رکھا گیا ہے، تاکہ شہری خود کو اپنے ماحول سے جڑا ہوا محسوس کریں۔

اجلاس میں ایم ڈی اے کے زیرتعمیر پانچ بس شیڈز کو 30 جون 2025 تک مکمل فعال کرنے کا ہدف مقرر کیا گیا، جبکہ مزید سات بس شیڈز 30 جولائی 2025 سے عوام کے لیے دستیاب ہوں گے۔ کمشنر ملتان نے ایم ڈی اے ہاؤسنگ کالونیوں میں پارکس کی خراب صورتحال پر نوٹس لیتے ہوئے فوری بحالی کی ہدایت جاری کی۔ انہوں نے کہا کہ پارکوں کی اپگریڈیشن کے ذریعے شہریوں کو صحت مند، صاف اور خوشگوار ماحول فراہم کیا جا سکتا ہے۔

عامر کریم خاں کے مطابق پی ایچ اے اس وقت شہر کے 69 پارکس کی دیکھ بھال کر رہا ہے۔ انہوں نے ہدایت دی کہ تمام پارکس کی تفصیلی فہرست مرتب کر کے ان کی فوری اپگریڈیشن کا آغاز کیا جائے۔حکومت پنجاب شہری سہولیات کی بہتری کو اولین ترجیح دے رہی ہے اور اس سلسلے میں تمام متعلقہ ادارے بھرپور انداز میں متحرک ہیں۔