مچل اسٹارک نے جنوبی افریقا کے خلاف فائنل میں متعدد ریکارڈ بنا دیے

اسٹارک براڈ کے بعد دوسرے بیٹر بن گئے جنہوں نے کسی ایک ملک میں ٹیسٹ میں نمبر 9 یا اس سے کم نمبر پر پانچ ففٹی پلس اسکور کیے

ہفتہ 14 جون 2025 13:53

مچل اسٹارک نے جنوبی افریقا کے خلاف فائنل میں متعدد ریکارڈ بنا دیے

لارڈز(اُردو پوائنٹ اخبارتازہ ترین - این این آئی۔ 14 جون2025ء) آسٹریلیا کے فاسٹ بولر مچل اسٹارک نے جنوبی افریقا کے خلاف ورلڈ ٹیسٹ چیمپئن شپ فائنل میں متعدد ریکارڈ اپنے نام کرلیے۔آسٹریلیا کے فاسٹ بولر مچل اسٹارک نے لارڈز کرکٹ گراؤنڈ میں جنوبی افریقا کے خلاف فائنل کی دوسری اننگز میں 58 رنز کی اننگز کھیلی اور اپنی ٹیم کو بھنور سے نکالنے میں اہم کردار ادا کیا۔

اسٹارک نے نویں نمبر پر بیٹنگ کے لیے آئے جب آسٹریلیا کی دوسری اننگز میں 73 رنز پر 7 وکٹیں گر چکی تھیں۔جنوبی افریقا نے میچ پر گرفت مضبوط کرلی تھی لیکن اسٹارک کی بیٹنگ نے ٹیم کے ٹوٹل کو 207 رنز تک پہنچایا اور ٹیم کی برتری 282 رنز تک پہنچا دی۔انہوں نے ایلکس کیری کے ساتھ آٹھویں وکٹ کے لیے 61 رنز کی اہم شراکت قائم کی۔

(جاری ہے)

اس کے بعد اسٹارک نے نیتھن لیون کے ساتھ تیسرے دن آسٹریلیا کی دوسری اننگز کا آغاز کیا تاہم دو رنز بنانے کے بعد لیون آؤٹ ہوئے لیکن پھر مچل اسٹارک نے جوش ہیزل ووڈ کے ساتھ مل کر 59 رنز بنائے جو اب کسی بھی آئی سی سی ٹورنامنٹ کے فائنل میں 10ویں وکٹ کے لیے سب سے بڑی شراکت ہے۔

جوش ہیزل ووڈ 17 رنز بناکر آؤٹ ہوئے جبکہ اسٹارک 58 رنز کے ساتھ ناٹ آؤٹ رہے۔ٹیسٹ فارمیٹ میں یہ اسٹارک کی آٹھویں نصف سنچری تھی جس نے انہیں اسٹیورٹ براڈ، ڈینئل ویٹوری، مائیکل ہولڈنگ، کرن مور، ٹم ساؤتھی اور گریم سوان سے آگے کر دیا ہے۔اسٹارک براڈ کے بعد دوسرے بیٹر بھی بن گئے جنہوں نے کسی ایک ملک (انگلینڈ) میں ٹیسٹ میں نمبر 9 یا اس سے کم نمبر پر بیٹنگ کرتے ہوئے پانچ ففٹی پلس اسکور کیے ہیں۔